Sintrén (Sisindiran ti Pasantrén)

KOLEKSI KANG FENDY SY. CITRAWARGA

     Toroktok olé-oléan, méré jambé dikorangan. 

     Nu moyok tong dilayanan, engké gé jempé sorangan.

     Jumaah poé Jumaah, ka Lagadar jeung Bi Uti. 

     Lega imah lega sawah, sakadar titipan Gusti.

     Pelesiran jeung Téh Rosa, mekel obat mekel tomat. 

     Beresihan pirang dosa, ku tobat sinareng toat.

Mawa panglay eujeung nangka, rék dibikeun ka Ceu Ida. 

Ulah palay ka naraka, seuneuna panas kacida.

Manggul sintung ti Parigi, ngarandeg lebah tampian. 

Hirup untung moal rugi, lamun panceg dina iman. 

Ka sawah manggul tarajé, pasosonten ka Citapén. 

Ibadah ulah talangké, bilih janten bangké mantén.

Ngipuk laja sisi batu, karinget teu saat-saat. 

Hirup bagja anu tangtu, salamet dunya ahérat.