SMA Negeri 10 Bandung Ngagelar Scouteng Cakalang III

Pembina jeung Pelatih Pramuka SMA Negeri 10 Bandung jeung sabagean pamilon 
Scouteng Cakalang III. | sundaonline.com

Saptu, 20 Agustus 2016, rebun keneh 42 regu pramuka penggalang ti 17 pangkalan (SMP) sa-Bandung Raya tumplek di SMA Negeri 10 Bandung anu pernahna di Jalan Cikutra. Eta barudak teh rek miluan acara Scouteng Cakalang III nu digelar ku eta sakola. “Upami dietang sareng panitia, pembina, pelatih sareng pendampingna mah aya kana 500 jalmina anu hadir dina ieu acara teh,” cek Yudianto, Pembina Pramuka Penegak Putra SMA Negeri 10 Bandung ka sundaonline.com basa ngawangkong di ruang wakasek.

Bari dihaminan ku Koordinator Seksi Lomba Scouteng Cakalang III, Aan Winara, Yudianto nu kapeto jadi sekretarisna ngajentrekeun, Scouteng Cakalang teh program unggulanna SMA Negeri 10 Bandung anu dilaksanakeun dua taun sakali. Dina prungna, lian ti barudak pramuka, pangurus OSIS SMA Negeri 10 Bandung oge kabaud jadi Panitia Scouteng Cakalang III. Aya kana 40 urangna barudak SMA Negeri 10 Bandung anu kabaud jadi panitia. Alhamdulillah Scouteng Cakalang meunang pangbagea anu nyugemakeun ti balarea. Barudak anu miluanana oge terus nambahan. Buktina, nu miluan Scouteng Cakalang III nepi ka 42 regu, tiap reguna aya dalapan urang. Samemehna, dina Scouteng Cakalang II anu miluanana 30 regu. Tuh, apan sidik ngaronjat jumlah nu miluanana. 

Aan Winara, Hetty Rahmawati, Lilis Lisnawati jeung Yudianto. | sundaonline.com

Enas-enasna mah Scouteng Cakalang teh teu bina ti pasanggiti alias lomba atawa kompetisi tea. Aya sawatara mata lomba anu digelar dina ieu acara, kayaning PBB, P3K, KIM Lihat jeung KIM Raba. KIM teh wancahan tina kemampuan indra manusia. Oge teu tinggaleun Kaulinan Sunda kayaning balap karung, egrang, balap bakiak jeung paku botol. Lian ti eta aya Lomba Ranking Satu pikeun ngasah pangaweruh umum jeung kapramukaan. “Janten, scouteng teh sanes sakoteng kaolahan tradisional anu ditinyuh ngangge ronde,” Yudianto ngeceskeun bari ngabelengeh seuri. Scoteng teh wancahan tina scout, competition jeung teenager. Lamun cakalang mah ngaran ambalanana. Cakalang oge wancahan tina Cakrabuana jeung Kencanalarang. Pikeun ambalan penegak putra di SMA Negeri 10 Bandung dingaranan Cakrabuana. Pikeun ambalan penegak putrina mah Kencanalarang. 

Insya Allah, dua taun deui, Scouteng Cakalang IV mah ambahanana leuwih lega, nya eta tingkat provinsi alias sa-Jawa Barat. Sasaranana 60 regu nu ngawengku 30 regu putra jeung 30 regu putri. Pikeun ngayakeun eta acara, panitia geus kudu tatahar ti genep bulan samemehna. “Upami teu kitu, engke kateteran deui sapertos dina Scouteng Cakalang ayeuna anu waktos persiapanana samporet ku margi kawagel ku sasih saum sareng liburan panjang,” cek Yudianto. 

Kepala SMA Negeri 10 Bandung, Ade Suryaman, S.Pd., M.M. | sundaonline.com

Salaku Kepala SMA Negeri 10 Bandung jeung Mabigus, Ade Suryaman, S.Pd., M.M., pohara reueusna basa ngaluuhan Scouteng Cakalang III teh. Inyana netelakeun yen eta acara nu digelar ti tabuh 08.30 nepi ka tabuh 17.00 teh salah sahiji wujud perhatianana dina raraga ngarojong barudak pramuka di sakolana anu mangrupa generasi harepan bangsa. Piraku teu rek kitu, da apan moto SMA Negeri 10 Bandung teh berilmu, berakhlak jeung berbudaya. Eta moto teh nyangkaruk dina kagiatan Scouteng Cakalang. Ku ayana Scouteng Cakalang III, kaciri ayana kolaborasi anu hade antara para pembina, para pelatih, kaasup para juri ti kepolisian, TNI AU, jeung PMI. “Apan tadi oge, waktos upacara bubuka, Kapolsek Cibeunying Kidul ngiring nyakseni,” Ade Suryaman ngungkabkeun deui kareueusna, sabab loba unsur muspika anu ngabageakeun kana eta acara.

Eta kareueus teh karasa pisan ku Dra. Lilis Lisnawati salaku Pembina Pramuka Penegak Putri SMA Negeri 10 Bandung, jeung Hetty Rahmawati salaku pelatihna. Malahan mah barudak nu jaradi pamilon oge milu reueus jeung suka senang ku ayana Scouteng Cakalang III teh. “Pokona mah resep,” cek Muhammad Ihsan Taufik ti SMP Negeri 35 Bandung anu ngerid lima regu alias 40 urang ti sakolana. Pon nyakitu cek Raihan Aryo anu ngerid dua regu ti SMP Negeri 44 Bandung, jeung Salwa anu sarua ngerid dua regu ti SMP Negeri 31 Bandung. [] ram