Tong Kabongroy ku Bisnis Komunitas

Bisnis komunitas alus mimitina wungkul. | sundaonline.com

Aisur (58) nepi ka dareuda basa nyaritakeun pangalaman usahana dina bisnis komunitas. Teu nyangka bakal pikieueun jadinya cenah. Ari sugan teh bener rek lana bisnis komunitas anu diiluanana. Sihoreng ukur saumur jagong. Eta guru SD pagawe negeri sipil di Katapang Kabupaten Bandung teh geus asa katipu sarta nyorang karugian Rp 60 juta. “Mangkaning eta artos teh kenging nambut ti bank,” pokna ka sundaonline.com sabada nampa iber ti babaturanana yen bisnis komunitas anu diiluanana geus ditutup ku pamarentah. 

Ku kituna, Aisur kudu ngawayahnakeun maneh, tiap bulan gajihna dipotong ku bank salila dua taun. “Ku margi dipotong, ayeuna mah akang nampi gajih teh mung Rp 600 rebu,” pokna deui ngaheruk. Ku ayana eta pangalaman, Aisur peupeujeuh, omat ulah gampang kabongroy ku bisnis komunitas. Da geuning eta bisnis teh lain nguntungkeun tapi kalah ka ngabuntungkeun.

Tadina mah, mun bener, tina ngaluarkeun modal Rp 60 juta teh Aisur bakal nampa kauntungan leuwih ti 100% dina tempo tujuh bulan alias 14 putaran anu pembayaranana dua minggu sakali. Ari pek nyatana, Aisur ukur nampa saputaran anu benerna mah. Ka dituna mah teu puguh nepi ka kiwari. “Untung we akang teu ngajak batur,” cek Aisur.

Nundang (48) anu ngajak Aisur oge sarua kabeureuyan. Ngan manehna mah ukur Rp 45 juta. “Tapi da sawareh artos anu ku abdi digolangkeun kana bisnis komunitas teh artos panas, kenging nambut ti batur, jabaning abdi kedah nambihan lima persen tiap sasihna. Duh, jangar kana sirah teh,” cek eta warga Cangkuang, Kabupaten Bandung, ka sundaonline.com. 

Sanajan bisnis komunitas mumul disebut MLM, money game, asuransi atawa arisan berantai, tapi dina enas-enasna mah teu bina ti money game anu ujung-ujungna sok nyiptakeun korban. “Da upami nyandak kana kamaslahatan mah moal dugi ka aya anu dirugelkeun,” Nundang netelakeun.

Anu nandangan lara samodel Aisur jeung Nundang teh loba. Rebuan. Malah aya anu saurangna nyorang karugian nepi ka ratusan juta ku ayana bisnis komunitas teh. Hadena, cek maranehna, dedengkotna kudu dicerek ku nu berwajib. Tong dibaekeun da geus sidik ngarugikeun balarea. [] sapu