Urang Islam Jaradi Vegetarian

Urang Islam keur meuli asakan vegetarian di Taman Kopo Indah Bandung | sundaonline.com

Ayeuna mah lain umat Budha jeung Advent wae anu vegetarian teh. Umat Islam oge loba nu jaradi vegetarian. Basa sundaonline.com ngalanto ka rumah makan vegetarian di Jalan Pajajaran Bandung, kaciri urang Islam keur ngantay rek meuli kadaharan vegetarian. Umumna, urang Islam jaradi vegetarian ku lantaran hayang sehat jeung ngarah tetep sehat. “Alhamdulillah, kana badan teh raoseun,” cek Pudji Astuti, warga kompleks perumahan Nataendah Bandung. 

Hanjakalna, di Bandung kawilang langka rumah makan vegetarian teh. Baheula, mun hayang kadaharan vegetarian anu ngeunah, Pudji jeung salakina, Wahyu Suwihyang, sok ngahajakeun indit ka vihara anu aya di Taman Kopo Indah II Bandung. Di eta vihara aya kantin vegetarian. Tapi, kiwari eta kantin geus tutup. Lain dumeh teu laku, tapi ku sabab euweuh juru masakna. Untungna, beh ditueun vihara aya nu nagog jualan asakan vegetarian kana roda. 

Saenyana, cek Pudji, cara hirupna vegetarian teh henteu ribet. Goreng tahu atawa tempe, diembohan ku seupan pecay jeung sambel tomat oge geus matak nikmat pikeun vegetarian mah. Angot sanguna anu pulen. Ku cara kitu teu matak hengker kana awak. Tiap poe Minggu, Pudji jeung Wahyu angger kuat ngaboseh sapedahna nepi ka Cianjur atawa Purwakarta. Padahal Pudji jeung Wahyu geus kaitung umuran, da anakna oge geus mahasiswa. “Pun anak oge vegetarian,” cek Pudji. “Malihan pun anak mah janten vegetarianana oge ti nuju dikakandung keneh,” pokna deui kebek ku kareueus. 

Meh sarua jeung pangalaman Pudji, nya eta Siti Umayah. Ieu indungna Hira Karmachela jeung Anami Dera anu nganjrek di Sanggar Indah Banjaran Kabupaten Bandung teh geus jadi vegetarian ti taun 1988 mula. Umayah nuturkeun salakina pangna jadi vegetarian teh. Ku lilana jadi vegetarian jeung ku resepna ngulik kana kuliner, Umayah remen nyadiakeun kadaharan vegetarian ala restoran. Tempe jeung tahu oge diulik jadi kadaharan anu mirip jeung lauk asin. Tarigu disulap jadi gluten, sumber protein vegetarian anu bisa dijadikeun sate, gule jeung sajabana. Ku cara kitu, Umayah netelakeun, jadi vegetarian moal kakurangan gizi. Buktina, Umayah sakulawarga bisa nyorang kahirupan anu sehat walafiat. “Pun anak oge duanana teu kakirangan gizi. Padahal pun anak mah duanana tos jaranten vegetarian ti nuju dikakandung keneh,” cek Umayah anu kungsi jadi asisten dokter. “Otakna palinter deuih,” pokna deui. 

Umayah ngajentrekeun, di Bandung masih langka warung vegetarian. Urang Islam anu vegetarian can katempo dagang asakan vegetarian. Nu daragang asakan vegetarian di Bandung umumna umat Budha jeung Advent. Sanajan kitu, Umayah sakulawarga sukuran ka Alloh, sabab nu dagang asakan vegetarian di Bandung teu nepi ka euweuhna. [] ram