Du’ana Warga Kampung Sompok, “Nu Miceun Runtah Sing Cilaka!”

Eta béwara nu sakitu tandesna teu dipalire ku nu sok mariceun runtah ka sisi jalan.
| sundaonline.com

Warga Kampung Sompok, Désa Bojongkunci, Kacamatan Pameungpeuk, Kabupatén Bandung, ngarasa ambek kapegung. Soalna, loba jalma saliwat anu sok ngalungkeun runtah ka sisi jalan di éta kampung. “Duka urang mana nu sok ngalungkeun runtahna mah,” cék Pa Tatang (52) ka nu nulis, anu kasampak keur ngagecruk macul di kebonna, peuntaseun runtah anu ngahunyud di sisi jalan, Senén, 19 September 2016. Harita, Pa Tatang dibaturan ku Pa Warya (39). “Pokona mah, siang-siang ogé sok kawénéhan, manéhna ngalungkeun runtah ka sisi jalan bari tumpak motor,” pokna deui ngajéntrékeun.

Pa Tatang jeung Pa Warya. | sundaonline.com

Eta kajadian téh geus lumangsung leuwih ti sataun. Tug ka wangkid ieu tacan aya ketak ti pamaréntah. Lamun geus kacida numpukna, Ketua RW di dinya ngeprak wargana pikeun mérésan éta runtah. “Biasana mah runtah téh diduruk,” Pa Tatang ngécéskeun. Upama teu kitu, cenah, runtah bakal terus numpuk jeung lébér nepi ka tengah jalan. “Soalna taya patugas kaberesihan anu bakal ngangkut éta runtah,” Pa Tatang ngébréhkeun.

Asa geus béak déngkak warga di dinya ngungkulanana. Malah, awahing ku ambek, warga nyieun béwara dina plang anu tuluy ditapelkeun kana tangkal. Eta béwara téh unina kieu: “Nu miceun sampah di dieu sing cilaka sakeluarga. Amin.” Rarasaan mah éta béwara téh kurang kumaha pikainggiseunana, tapi da geuning teu metu, anu miceun runtah ka dinya téh angger wé aya. Teu euih-euih, teu kireum-kireum. “Duka kedah kumaha,” Pa Tatang gogodeg. [] Endang GG