Kamajuan Kota Bandung Tacan Walatra

Drs. Baehaqi, SPd. | sundaonline.com

Ketua RT 08, RW 07, Kelurahan Kebonlega, Kecamatan Bojongloa Kidul, Drs. Baehaqi, SPd, ngacungkeun jempolna basa nyaritakeun kamajuan Kota Bandung teh. “Kamajenganana ampir 80%,” pokna ka sundaonline.com, sawatara waktu kaliwat. Ngan hanjakal kamajuanana teu rata. “Da geuning Kebonlega mah angger we kumuh, kumuhna oge lega keneh,” pokna deui bari ngaheheh. 

Baehaqi netelakeun, salila ieu Walikota Ridwan Kamil tacan kawenehan sumping ngalayad wewengkon Kebonlega. Padahal Kebonlega mah caket ti puseur kota. Upama usum hujan, Kebonlega sok banjir. Tangtu bae, salaku Ketua RT, Baehaqi sok katempuhan, dinaha-naha ku wargana, ku naon Kebonlega bet banjir wae. Padahal saban poe Minggu inyana sok beberesih. Ku kituna, inyana miharep ayana solusi. “Matakna abdi kalintang bagjana upami Pa Walikota kersa rurumpaheun ka dieu,” Baehaqi ngageletis. “Punten we Pa Wali ngalirik ka palih dieu, ulah ka palih ditu wae, ka Babakan Siliwangi wae,” pok deui-pok deui nyarita kitu.

Lian ti eta, Baehaqi netelakeun sual keuangan sa-RW anu Rp 100 juta tea. Tug ka ayeuna nga saukur programna wungkul, realisasina ka RT mah teu aya. “Ti harita teh RT mah ngan saukur dipasihan lampu we,” pokna. Duka macet ti manana. Nu pasti eta artos teh kedahna mah dugi ka tingkat RT oge. Tiap rapat sok ditanyakeun perkara eta teh. Tapi jawabanana teh cukup ku teu acan we. Ku kituna, sakali deui Baehaqi miharep ka Pa Wali, ulah dugi ka anu dijugjug teh Ujungberung deui-Ujungberung deui. “Kebonlega oge peryogi diriksakeun, da ujung teh apan sanes berung wungkul,” eta Wakil Kepala MA Sirnamiskin Bandung teh ngaheheh deui bari tungtungna nyebutkeun yen warga Kebonlega asa dianakterekeun.

Dani Hamdani. | sundaonline.com

Aya deui nu ngemu kahanjelu teh, nya eta Dani Hamdani, warga asli Jalan Kopo Bandung. Saenyana, inyana pohara reueusna kana kamajuan Kota Bandung ti saprak dipingpin ku Ridwan Kamil salaku walikotana. Ngan hanjakal fokus perhatianana tamplok teuing ka puseur kota, nepi ka Jalan Kopo beulah kidul mah kaluli-luli nasibna. “Tingal we, ti ngawitan Leuwipanjang dugi ka Kopo palih kidul mah teu acan aya trotoarisasi,” eta Kepala TU MA Sirnamiskin Bandung teh ngajentrekeun.

Sajaba ti eta, Dani Hamdani oge masih ngemu kahanjelu ku pelayanan pamarentah anu goreng ka masarakat. Maksudna? “Sumuhun apan abdi teh nuju ngadamel kartu keluarga (KK),” pokna. Ngan eta KK teh teu jadi-jadi. Padahal geus tilu bulan lilana. “Abdi nguruskeunana ku nyalira. Tapi da saurna di kacamatan anu sanes mah tilu minggu oge kelar ngadamel KK teh,” cek eta warga Cibolerang, Kalurahan Margasuka, Kacamatan Babakan Ciparay, Kota Bandung.

Teuing ku naon cenah, da apan ari lilana nyieun KTP mah ku lantaran taya blankona, tapi ari lilana nyieun KK mah duka. Nu pasti, basa ditanyakeun, cek patugas KK anu diamprah ku Dani Hamdani teh bakal kelarna ahir September atawa Oktober. Kitu oge mun teu nyalahan. [] ram