Kota Bandung 206 Taun, Kasadaran Masarakatna Cawadeun Keneh

Kepala SMA PGRI 1 Bandung, Muslim Triaji Sundasyah, MPd. | sundaonline.com

Kepala SMA PGRI 1 Bandung katut murid-muridna. | sundaonline.com

Kepala SMA PGRI 1 Bandung, Muslim Triaji Sundasyah, MPd, kalintang reueusna ku kaayaan Kota Bandung anu pikabetaheun ti saprak diwangun ku Walikota Ridwan Kamil. “Sanaos kitu ari hal anu kedah dibebenah mah tetep aya, utamina dina perkawis kasadaran masarakatna,” pokna ka sundaonline.com, di tempat dinesna, sawatara waktu ka tukang. Da geuning cenah aya we cawadeunana masarakat teh. Utamana dina perkara ngajaga ruang publik. Ku kituna, ngawangun karakter masarakat jadi leuwih utama. “Utamina di lingkungan kulawarga,” pokna deui daria. Ajen-inajen budaya anu ngawengku tata-titi, tindak-tanduk, etika jeung sabangsana, kudu terus dihangkeutkeun. Sakola memang boga kawajiban dina perkara ngawangun karakter, tapi masarakat teu bisa ngandelkeun sagemblengna ka pihak sakola, da ari ngandelkeun lingkungan sakola wungkul mah kawatesanan.

“Intina mah, salaku warga Kota Bandung abdi masih midangdam ayana katartiban dina sagala widang. Tartib di jalan raya dina hal berlalu-lintas. Tartib dina sual ngokolakeun runtah. Pon nyakitu dina hal-hal anu sanesna. Wilujeng milangkala Kota Bandung. Mugia tambih dewasa, tinekanan janten Bandung Juara,” Muslim Triaji Sundasyah mungkas wangkonganana.

Supervisor Restoran Raja Sunda, Amir Lili. | sundaonline.com

Pon nyakitu cek Supervisor Restoran Raja Sunda, Amir Lili. Sanajan pituin urang Ciamis, Amir Lili kalintang reueusna bisa jadi warga Kota Bandung. “Lingkunganana di Kota Bandung mah raoseun,” pokna ka sundaonline.com di tempat dinesna, sawatara waktu kaliwat. 

Amir Lili nganjrek di Kota Bandung ti taun 1984. Inyana mere cap jempol ku ayana program-program kreatif ti pamarentah pikeun mapaesan Kota Bandung. “Abdi bingah pisan basa nguping leuweung di Bandung palih kaler bade diabadikeun,” pokna deui. Hanjakalna teh kasadaran masarakatna masih kurang. Amir Lili masih sok merego warga anu miceun runtah sambarangan. Padahal apan eta runtah nu dipiceun sambarangan teh matak mengpetan kamalir anu nimbulkeun banjir upama hujan. [] ram