LISSWA SMA PGRI 1 Bandung Ngamumule Budaya Sunda

Dokumentasi SMA PGRI 1 Bandung.

Sanajan SMA PGRI 1 Bandung geus gilig rek jadi sakola berbasis IT, ari kana budaya Sunda mah moal mopohokeun. Malah mah, awahing ku nyaah ka Ki Sunda, SMA PGRI 1 Bandung ngayakeun ekstra kurikuler unggulan anu ngaranna LISSWA, wancahan tina Lingkup Seni Sunda Siswa. Ari pangna eta sakola ngayakeun LISSWA nya eta ngarojong pamarentah Kota Bandung dina raraga ngamumule budaya Sunda. “Atuh da bade ku saha deui dimumulena budaya Sunda teh ari sanes ku urang Sunda mah,” cek Kepala SMA PGRI 1 Bandung, Muslim Triaji Sundasyah, M. Pd., basa ngawangkong jeung sundaonline.com, di tempat dinesna, sawatara waktu kaliwat. 

Kepala SMA PGRI 1 Bandung, Muslim Triaji Sundasyah, M. Pd. | sundaonline.com

Wakasek Kesiswaan SMA PGRI 1 Bandung, H. Nurjaman, S.Pd. | sundaonline.com

Ku kituna, nu kasebut kasenian Sunda nyampak dina LISSWA, kayaning tari merak, jaipongan jeung tari-tari sejenna. Sisingaan, calung jeung sajabana oge aya. Angot seni upacara adat Sunda mah. “Kaetang pangseringna ngayakeun upacara adat Sunda mah,” Wakasek Kesiswaan SMA PGRI 1 Bandung, H. Nurjaman, S.Pd., milu mairan. 

Ngadegna LISSWA teh taun 2012 ku alpukahna H. Nurjaman. Padahal inyana lain lulusan seni karawitan. “Abdi mah ti jurusan ekonomi,” pokna bari ngaheheh. Ngan ti mangsa rumaja keneh H. Nurjaman geus resep kana kasenian Sunda, teureuh ti ibuna anu resep kana ngawih. Jaman kuliah oge inyana aktif dina kasenian, utamana dina kacapi suling. Pangna ahirna ngadegkeun LISSWA, nya eta apan, sajaba ti resep kana seni, utamana mah bawaning ku nyaah tea ka Ki Sunda. 

Dokumentasi SMA PGRI 1 Bandung.

Samemehna jadi LISSWA, cek H. Nurjaman, aya opatan nu sok “reresepan” maen kacapi suling. “Tempona nyalse abdi oge sok maen kacapi,” pokna ngajentrekeun. Ti dinya pada nuturkeun tug ka ahirna ngadeg LISSWA anu disahkeun ku kapala sakola taun 2012. Ayeuna barudak anu aktif di LISSWA aya kana 40 urangna.

Pasanggiri lain udagan anu utama. Pokona, lamun aya event-event kasenian Sunda, ari apal mah LISSWA pasti miluan. Di Babakan Siliwangi oge LISSWA remen kaul. Basa ku Lurah dipentes pikeun minton dina raraga 17 agustusan, LISSWA oge aub. Ku kituna, cek H. Nurjaman, barudak LISSWA lain bae mekar dina kreativitas senina, tapi oge geus bisa ngala artos tina alatan aktif dina kasenian. Lebah dinya, katangen yen budaya Sunda teh geuning diajenan kalayan hade ku balarea. [] ram