MA Sirnamiskin Bandung Nyongcolang dina Seni Budaya

Seni budaya Sunda jadi kareueus MA Sirnamiskin Bandung.
| Dokumentasi MA Sirnamiskin Bandung

Madrasah Aliyah (MA) Sirnamiskin Bandung ti mimiti ngadegna taun 1970 ku balarea dilandihna sakola agama. Tapi kiwari, sajaba ti tetep kawentar sakola agama, eta sakola anu pernahna di Jalan Kopo Cirangrang Bandung teh katelah jadi sakola seni budaya. Naha? Atuh da tina 16 ekstra kurikuler (ekskul) anu aya di eta sakola, seni budaya kawilang ekskul pangnyongcolangna. “Alhamdulillah, ekskul seni budaya janten daya tarik anu positif, oge murangkalih jaranten betah di sakola,” saur Kepala Madrasah Aliyah (MA) Sirnamiskin Bandung, Agus Abdul Wahid, SH, MSi, ka sundaonline.com di tempat dinesna, Saptu, 17 September 2016. “Ku betahna di sakola, murangkalih teh janten katalingakeun dina pergaulanana,” pokna deui dihaminan ku wakilna, Drs. Baehaqi, SPd, sareng Wakasek Kesiswaan MA Sirnamiskin Bandung, Agus Irwan, SPd.

“Aya tilu katagori ekskul di dieu teh, nya eta seni budaya, olah raga sareng kaagamaan. Mung anu katingal onjoy mah seni budaya,” Agus Irwan mairan. 

Kepala Madrasah Aliyah (MA) Sirnamiskin Bandung, Agus Abdul Wahid, SH, MSi,
Wakilna, Drs. Baehaqi, SPd, sareng Wakasek Kesiswaan, Agus Irwan, SPd.

Ekskul seni budaya di MA Sirnamiskin Bandung diasuh ku Ade Muhamad Sidik anu ngarangkep jadi guru seni budaya di eta sakola. “Alhamdulillah, murangkalih di dieu resepeun pisan kana seni budaya,” saurna kalayan reueus.

Ade Muhamad Sidik netelakeun, ekskul seni budaya di MA Sirnamiskin Bandung teh ngawengku seni tari tradisional, galura, sisingaan, jaipong, karawitan, marching band, alat musik nasional kayaning gitar, bongo, konga jeung sajabana. Lian ti eta oge aya olah vokal anu arahna kana qiroat, pop jeung dangdut. Buah tina kadariaan barudak MA Sirnamiskin Bandung kana seni budaya teh geus kaciri ngajadi bukti. “Salasawiosna MA Sirnamiskin Bandung kapeto janten juara kahiji dina festival nasyid sa-Bandung Raya,” Ade Muhamad Sidik ngajentrekeun. 

Kampus MA Sirnamiskin Bandung. | Dokumentasi MA Sirnamiskin Bandung

Lian ti eta, ekskul seni budaya MA Sirnamiskin Bandung nyangking juara katilu sa-Jawa Barat dina Gebyar Kreasi Seni Nusantara di Uninus, juara kahiji jeung juara kostum pangalusna sa-Bandung Raya dina Ekspresi SMK Marhas Open III, sarta juara kahiji syarhil Qur’an sa-Bandung Raya. Dina lomba adzan, vocal group, kaligrafi jeung penca silat oge barudak MA Sirnamiskin kapeto jadi juarana. “Alhamdulillah, eta prestasi teh buahna tina potensi anu teras digali sareng dimekarkeun ku kakeyeng,” cek Ade Muhamad Sidik.

Sanajan resep kana seni budaya, MA Sirnamiskin Bandung moal sologoto. Kasenian anu papalingpang jeung prinsip kapasantrenan tangtu moal diayakeun di eta sakola. “Pokona mah selektif,” saur Agus Abdul Wahid, SH, MSi, basa mungkas wangkongan perkara seni budaya jeung sundaonline.com. [] ram