Rebo Nyunda Kakara Semet Cangkang

Ayi Sutarman, S. Sos. | sundaonline.com

Kepala TU SMA Negeri 18 Bandung, Ayi Sutarman, S. Sos., masih ngemu kahanjelu ku ayana program Rebo Nyunda teh. Naha? “Atuh da geuningan dina leresan aplikasina mah kirang, nu kasebatna tata-titi tindak-tanduk meh teu dianggo. Mangga we bandungan, barudak di sakola oge masih ngangge basa-basa anu kirang merenah diucapkeun,” pokna basa ngawangkong jeung sundaonline.com di tempat dinesna, Rebo, 7 September 2016.

Efektifna mah efektif program Rebo Nyunda teh. Ngan kakara semet baju. Tapi apan cirina nyunda teh lain ngan sasemet baju. “Acuk mah cangkang,” Ayi Sutarman netelakeun. “Da ari acuk mah ku nu sanes urang Sunda oge tiasa diangge. Nanging apan basana oge kedah nyunda,” pokna deui 

Sabot ngawangkong, torojol Guru BK SMP Negeri 31 Bandung, Mulia Suprijatna, S. Pd., anu jadi Ketua Komite SMA Negeri 18 Bandung. Inyana sapamadegan jeung Ayi Sutarman. “Rebo Nyunda teh sae. Ngan sipatna masih struktural. Gebyarna teh ku lantaran ayana parentah ti luhur. Da nu paling fundamental mah ngawangun kasadaran kasundaanana,” cek Mulia Suprijatna ka sundaonline.com.

Mulia Suprijatna, S. Pd. | sundaonline.com

Urang Sunda teh cenah tong nepi ka asing ka bangsana sorangan. Tapi da geuning ayeuna mah, tong boro pantar barudak, pantar pajabat oge jarang nu make basa Sunda. Ku kituna pajabat teh geus asing kana basa Sunda. Mun kitu mah kumaha rek bisa nepi ka barudak atuh. Jadi saolah-olah ukur gebyarna wungkul Rebo Nyunda teh. “Gebyar Sunda tapi eusina euweuh, kosong!” pokna. 

Jadi, cek Mulia Suprijatna, sok mimitian heula ku pupuhuna. Contoan heula. Lamun pidato di mana-mana kudu make basa Sunda ari poe Rebo mah. Ieu mah pajabat teh make basa Indonesia. Pajarkeun teh punten da acarana acara nasional. “Heueuh nasional, tapi apan ieu teh poe Rebo, heg di Bandung deuih,” Mulia Suprijatna beuki harus nyaritana. “Intina, upama pajabat teu bisa make basa Sunda, nya wayahna kudu diajar,” pokna deui. 

Diajar bahasa mah kudu jeung prakna. Lamun keukeuh teu bisa, wayahna we ari pajabat mah kudu satekah polah. Nyieun-nyieun teks atuh dipangnyieunkeun ku urang Sunda. Bisa meureun. Keun bae pabeulit oge teu nanaon. Kumaha we carana mah. Intina mah nembongkeun yen urang teh konsekuen kana ngibarkeun basa Sunda. Basa we heula ayeuna mah. Ulah waka kana masagi-masagi kitu. Saeutik-saeutik heula we deuih. 

Ayeuna barudak diajar basa Sunda ti SD mula. Tapi teu bisa-bisa. Ari kana basa Inggris norolang. Pan urang teh jadi era ku kasundaan. Matakna di sakola kedah diupayakeun, upami nyarios sareng rerencangan cobi ku basa sunda, upami rapat kaping 17 cobi ku basa sunda. Eta teh kedah diupayakeun. Ngawulang oge kedahna mah kitu, tapi da nyakitu tea di sakola mah aya nu alesanana teh da abdi mah urang Jawa, da abdi mah urang Batak. Padahal ari calikna di kota Bandung mah urang mana wae oge wayahna. Piraku tina samingu ngan sapoe ngajar—ngan genep jam—ku basa sunda, atuh maksakeun we cek urang mah. Tapi da teu bisa maksa. “Tah ieu akibatna tina parentah teh. Jadi kasundaan teh gebyar. Nepina kakara semet cangkang. Piraku aya LSM Sunda tapi beringas, asana teh kumaha, da ti baheula oge urang Sunda mah kasohor someahna,” Mulia Suprijatna tuluy gogodeg bari diengklokkan ku Ayi Sutarman. [] ram