Rebo Nyunda, Nyundakeun Urang Sunda

Jana Kusdinar, M. Ds., jeung Dra. Eva Syarifah. | sundaonline.com

Sawatara guru di Kota Bandung kalintang reueusna ku ayana program Rebo Nyunda. “Program Rebo Nyunda teh sae, minimal kangge nyundakeun urang Sunda,” cek Guru Seni Budaya SMP Negeri 6 Bandung, Jana Kusdinar, M. Ds., ka sundaonline.com, di tempat dinesna, Rebo, 7 September 2016. “Seueur urang Sunda anu hilap kana jati dirina salaku urang Sunda. Eta we geuning nyarios oge jarang ku basa Sunda. Tah, sugan ku ayana Rebo Nyunda mah urang Sunda kageuing pikeun ngahirupkeun ajen-inajen kasundaan,” pokna deui kalayan daria. 

Wakasek Humas SMP Negeri 6 Bandung, Dra. Eva Syarifah, oge sapamadegan. Malah inyana netelakeun, Rebo Nyunda teh efektif pisan. “Ku ayana Rebo Nyunda, tiap dinten Rebo murangkalih nganggo raksukan Sunda, kabaya atanapi pangsi. Kalihna ti eta, nyariosna oge sakedik-sakedik ngangge basa Sunda,” cek Dra. Eva Syarifah kalayan darehdeh. “Urang Sunda kedah ngamumule budaya lokal, saha deui anu bade ngamumule upami sanes urang Sunda nyalira,” eta guru IPS teh nganjentrekeun. Ku kituna cenah sugan beh dituna barudak bisa ngajenan kana kasenianana, kulinerna, jadi beuki wanoh kana budaya Sunda. 

Prapti Handayani, S.Pd., jeung Nani Budiningsih, M.Pd. | sundaonline.com

Pon nyakitu cek Wakasek Humas SMP Negeri 24 Bandung, Nani Budiningsih, M.Pd., jeung Guru Bahasa Inggris SMP Negeri 24 Bandung, Prapti Handayani, S.Pd., kacida reueusna ku ayana Rebo Nyunda teh. Padahal arinyana lain pituin urang Sunda. “Abdi mah urang Sumatera,” cek Nani Budiningsih, M.Pd., anu sapopoena ngajar matematika. 

“Upami abdi mah urang Jawa,” Prapti Handayani, S.Pd., ngajentrekeun. Ku ayana Rebo Nyunda, atuh ngajar bahasa Inggris oge sok direumbeuy ku basa Sunda. “Tapi, saleresna mah, basa Sunda kirang cocok janten basa pengantar dina pelajaran bahasa Inggris,” pokna deui. 

Ngan, upama dina pelajaran bahasa Inggris, atawa pelajaran nu lianna, aya budak nanya ku basa Sunda geus tangtu moal disalahkeun ku guruna. Angot nanyana dina poe Rebo mah. Di luar poe Rebo oge moal dicarekkan eta budak nu make basa Sunda teh. “Ayeuna mah teu kenging diseuseulan murangkalih teh,” cek Dra. Eva Syarifah bari marahmay. [] ram