Sisi Jalan Cikambuy Jadi Pamiceunan Runtah

Sisi Jalan Cikambuy jadi pamiceunan runtah. Warga masang sepanduk ngarah taya nu wani deui miceun runtah. Tapi angger bae nu ngalungkeun runtah ka dinya teu euih-euih. | sundaonline.com

Nu sok miceun runtah ka sisi Jalan Cikambuy, Desa Sangkanhurip, Kacamatan Katapang, Kabupaten Bandung, geus nimbulkeun pidosaeun. Dosana lain bae jalan jadi bala ku runtah, tapi dosa ku lantaran ayana salah sangka. Tadina mah apan batur nyangkana nu sok miceun runtah ka sisi jalan teh warga di dinya keneh. Ari pek lain. Puguh warga Cikambuy mah geus ngageremet ku nu sok mariceun runtah ka sisi jalan teh. Tapi cenah duka urang mana anu mariceun runtahna mah. Da taya nu ngaku nepi ka wangkid ieu oge. Ngan, cek warga Cikambuy, nu sok mariceun runtah ka sisi jalan mah urang lembur batur anu marake sapedah motor, geus niat ti imahna rek ngalungkeun runtah ka sisi Jalan Cikambuy. 

“Harianeun,” cek sawatara warga Cikambuy ka sundaonline.com, Rebo, 7 September 2016. “Awahing ku keuheul, nya kapaksa masang sepanduk,” pokna deui.

Dina eta sepanduk, warga Cikambuy nangtang ka sing saha bae anu kumawani miceun deui runtah ka dinya, wayahna kudu urusan jeung warga. Tapi, nepi ka kiwari di antara nu sok mariceun runtah ka sisi Jalan Cikambuy teh tacan aya saurang-urang acan anu wani adu hareupan jeung warga. Ngan ari runtahna mah angger ngalobaan. “Matak jangar puguh oge,” salah saurang warga Cikambuy kutuk gendeng. [] sapu