Sisingaan Kojona Seni Budaya MA Sirnamiskin Bandung

Ade Muhamad Sidik sareng barudak asuhanana dina tim sisingaan MA Sirnamiskin Bandung.
| Dokumentasi MA Sirnamiskin Bandung

Ramadani Suryatu Awal, Kelas XII IPS 3, jeung Meli Patimah, Kelas XI MIA 2, mani pogot basa nyaritakeun sisingaan ka sundaonline.com teh. “Atuh da resep ngiringan sisingaan mah, gumbira wae hate teh,” cek arinyana di payuneun guruna, Ade Muhamad Sidik.

Enya, eta dua siswi MA Sirnamiskin Bandung teh nu miluan sisingaan dina ekskul seni budaya. 

Memang kitu cek Ade Muhamad Sidik, perbawana sisingaan mah gumbira. Tah, ku lantaran mawa kagumbiraan, sisingaan diayakeun dina ekskul seni budaya MA Sirnamiskin Bandung. “Supados murangkalih anu nyuprih elmu di dieu ngaraos galumbira,” pokna.

Apan dina sajarahna oge kitu, sisingaan teh simbul kagumbiraan bangsa Indonesia anu aya di Tatar Sunda sabada tinekanan ngusir Walanda anu geus ngajajah bangsa urang nepi ka tilu satengah abad lilana. Geura lenyepan upama aya nu nanggap sisingaan dina acara sunatan. Geuning budak sunat teh nyengcle tumpak sisingaan. Eta teh simbul yen bangsa urang geus bisa nalukkeun penjajah. Balarea oge apal singa teh sato galak anu pikasieuneun lir penjajah tea. Tapi ku budak sunat mah ditumpakkan. Tah, eta budak sunat teh nyimbulkeun wawanen bangsa urang anu leber nepi ka bisa nalukkeun penjajah. Matakna dina sisingaan mah aya arak-arakan jeung ajrag-ajragan nembongkeun kagumbiraan. “Kitu filosofisna mah,” Ade Muhamad Sidik anu ngemban amanah ti Bah Memed (suargi) pikeun ngamumule seni Sunda teh ngajentrekeun.

Barudak MA Sirnamiskin Bandung anu miluan ekskul seni budaya teh ngaratus jumlahna. Tapi anu milu sisingaan mah ngan 20 urang. Alhamdulillah, sanajan kasebutna anyar ngadeg, tim sisingaan MA Sirnamiskin Bandung geus kapeunteun ku balarea. Malahan mah geus remen dipentes ku balarea pikeun pentas. Instansi pamarentah, salasahijina Dispopar Kota Bandung, kungsi ngondang tim sisingaan MA Sirnamiskin Bandung pikeun mintonkeun kamonesanana. Basa taun kamari TVRI Jabar Banten ngayakeun acara milangkala oge tim sisingaan MA Sirnamiskin Bandung oge diogan pikeun ngeusian acarana. Ku kituna, teu salah seug sisingaan disebut kojona dina ekskul seni budaya di MA Sirnamiskin Bandung.

Ngan hanjakal, cek Ade Muhamad Sidik, tug ka wangkid ieu pasanggiri sisingaan tacan kungsi nepi ka tingkat provinsi. Ti baheula teh ngan sasemet Kabupaten Subang we pasanggiri sisingaan mah. Duka kunaon. Padahal, Ade Muhamad Sidik katut barudak asuhanana, kaasup Ramadani Suryatu Awal jeung Meli Patimah, netelakeun yen sisingaan teh lain bogana masarakat Subang wungkul, tapi bogana masarakat Sunda, malah teu salah upama disebut bogana masarakat Indonesia oge, da apan seni budaya lokal—kaasup sisingaan—teh kaasup aset bangsa Indonesia anu kudu dimumule. [] ram