Sisingaan Mawa 'Pede' kana Prestasi

Meli Patimah jeung Ramadani Suryatu Awal. | sundaonline.com

Lian ti mere kasugemaan batin, pikeun Ramadani Suryatu Awal alias Ratu jeung Meli Patimah mah sisingaan teh unik. Atuh da, hususna di Kota Bandung, kawilang langka ayana ekskul sisingaan di sakola teh. Ku aktifna dina sisingaan, Ratu jeung Meli jadi tambah pede. Ku pede-na, Meli oge siap maju jadi Ketua OSIS MA Sirnamiskin Bandung. 

“Pokona mah karakter seni sisingaan teh cocok sareng karakter abdi anu resep ajrag-ajragan,” cek Meli anu asalna ti Tasik bari imut. 

Ratu jeung Meli keur tumpak sisingaan. | Dokumentasi MA Sirnamiskin Bandung

Malah pikeun Ratu mah, sisingaan teh sasat jadi panglipur kolbu. Kapeurih dirina baheula geus kaubaran ku sisingaan. Na kumaha kitu? Cek Ratu, basa keur di SD, basa Ratu hayang miluan tari mayangkaton, ku guruna dihulag, sabab awak Meli anu leutik dianggapna teu pantes jadi penari mayangkaton. Pajarkeun teh awak leutik kitu bisa naon. Tangtu we batin Ratu asa digerihan. “Waktos harita abdi asa janten jalmi anu teu aya gunana,” cek Ratu ka sundaonline.com bari ramasbas. 

Ti saprak dihiap ku Ade Muhamad Sidik pikeun aktif jadi penari latar dina sisingaan, Ratu pohara atohna. Angot tim sisingaan MA Sirnamiskin Bandung jadi ikon dina ekskul seni budaya sarta kapake ku balarea. Ku timbulna rasa pede, Ratu oge teu asa-asa pikeun miluan pasanggiri nepi ka ahirna kapeto jadi juara kahiji Syarhil Qur’an sa-Bandung Raya. 

Ade Muhamad Sidik teu petot-petot ngaping barudak asuhanana, kaasup Meli jeung Ratu.
| sundaonline.com

Pon nyakitu Meli. Salila nyuprih elmu di MA Sirnamiskin Bandung, Meli kungsi kapeto jadi juara katilu sa-Jawa Barat dina Gebyar Kreasi Seni Nusantara di Uninus, juara kahiji jeung juara kostum pangalusna sa-Bandung Raya dina Ekspresi SMK Marhas Open III, juara kahiji dian Festival Nasyid MIM sa-Bandung Raya, jeung juara katilu Tapak Perkemahan Persami Kodim 0618/BS. 

Tangtu bae, eta prestasi teh buah tina kakeyeng dirina nu diaping ku Pa Ade Muhamad Sidik, Pa Asep Kurniawan Sidik, Pa Hilman Yusuf, Pa Dani Hamdani, Pa Atori, Pa Firman, Ibu Iim, Ibu Diah, sarta guru-guru lianna. [] ram