Sistim Geus Online, Nyieun e-KTP Angger Hese

Sanajan sistimna geus online, nyieun e-KTP angger hese. | sundaonline.com

Poe Kemis, 15 September 2016, Teo, warga Cileungsi Bogor kudu ngawayahnakeun indit ka Kantor Pemkab Bandung pikeun nguruskeun KTP-na. Soalna, cek eta desainer grafis anu sapopoena ngantor di Jakarta teh, Teo kadekteksi sacara online mibanda dua kapendudukan. “Apan abdi teh asalna ti Cicalengka Kabupaten Bandung. Teras ngalih ka Cileungsi Bogor. Tapi waktos ngalih abdi masrahkeun serat ngalih sakumaha kedahna. Mung ayeuna, tempona bade ngadamel e-KTP, abdi kedah ka Pemkab Bandung kanggo mupus kapendudukan abdi di Kabupaten Bandung,” Teo ngageletis.

Padahal Teo geus mangtaun-taun cicing di Cileungsi Bogor. Da eta we, ti barang pruk nikah nepi ka ayeuna geus boga dua anak. “Pun anak nu cikal oge tos kelas lima SD,” pokna ka sundaonline.com. “Ari sugan teh ti saprak abdi ngalih ka Cileungsi Bogor tos taya masalah dina perkawis kependudukan,” Teo kerung. 

Nu teu kaharti ku Teo, naha ongkoh sistim teh geus online, tapi ngungkulan masalah kapendudukan teu bisa online. Teo angger kudu adu hareupan jeung sistim birokrasi anu ribet. Ari kitu mah cenah kateuteuari ayana sistim online dina uras-urus surat kapendudukan teh. “Da nu kahartos ku abdi mah, sistim online teh kangge ngagampilkeun prosedur, tapi da bangsa urang mah tos biasa hirup hese, janten anu kedahna tiasa gampil oge dihesekeun we,” Teo rada ngageremet. 

Cek Teo anu sok nampa order desain sacara online, ku sistim online mah transaksi antar nagara oge jadi gampang. Angot ieu antar kota atawa kabupaten. “Sumuhun, ieu mah pangalaman abdi, ku sistim online mah nampi order ti mancanagara oge janten gampil. Upami kenging order ti Amerika, abdi teu kedah miang ka Amerika. Pon nyakitu dina waktos pembayaran, urang Amerika anu pesen desain ka abdi teu kedah sumping ka rorompok. Pokona, ku sistim online mah, sakedahna, janten gampil prosedur teh,” Teo netelakeun hebatna sistim online anu saestuna. [] ram