SMA Negeri 10 Bandung Ngayakeun DORAS-X

Panitia DORAS-X.

Abong kasebutna sakola rujukan, SMA Negeri 10 Bandung mah loba pisan kagiatan. Geura eta we, basa sundaonline.com ngalanto ka eta sakola, Senen, 5 September 2016, kasampak di dinya keur aya kagiatan DORAS-X jeung Pemilu Ketua OSIS Periode 2016-2017. Sanajan kitu henteu ari nepi ka pahibut mah, da tiap kagiatan dipernahkeun dina tempat anu beda. Padahal apan cik keneh SMA Negeri 10 Bandung teh geus ngayakeun Scouteng Cakalang III.

“Alhamdulillah, acarana mah lancar,” cek Wakasek Bidang Humas SMA Negeri 10 Bandung, Siti Kurniasih, S.Pd., M.M., ka sundaonline.com, di tempat dinesna. Tuluy inyana nepungkeun sundaonline.com jeung panitia acara DORAS-X anu pernahna di hareup, teu pati jauh ti gapura sakola. 

Harita anu ditepungan teh Ketua Pelaksana DORAS-X, Ismail AS, siswa Kelas XI Bahasa SMA Negeri 10 Bandung, katut Pembinana, Dra. Nining Yuningsih. Alhamdulillah cenah DORAS-X teu weleh dibageakeun ku balarea. Ari DORAS-X teh wancahan tina Donor Darah Sukarela SMA Negeri 10 Bandung. Ieu acara dilaksanakeun tilu bulan sakali. Ku hadena pangbagea ti balarea, nu daptar jaradi donor salila pendaptaran, ti tabuh 08.00-10.00, nepi ka 103 urang. Tapi anu ditarima jadi donorna mah ngan 62 urang. Sesana, cek Ismail, sanes kabur, tapi arinyana teu nyumponan pasaratan jadi donor.

Para guru, tenaga administrasi sekolah (TAS) jeung barudak SMA Negeri 10 Bandung
jaradi donor darah. | Dokumentasi Panitia DORAS-X

Kepala SMA Negeri 10 Bandung, Ade Suryaman, S.Pd., M.M., oge
janten donor darah.

Di antara 62 donor teh nya eta Kepala SMA Negeri 10 Bandung, Ade Suryaman, S.Pd., M.M., guru-guru, tenaga administrasi sekolah (TAS), siswa-siswi, jeung sajabana. “Ieu kagiatan teh tos lumangsung ti taun 2001,” cek Pembina Palang Merah Remaja (PMR) SMA Negeri 10 Bandung, Dra. Nining Yuningsih. DORAS-X mangrupa hasil gawe barengna barudak PMR SMA Negeri 10 Bandung jeung Palang Merah Indonesia (PMI) Kota Bandung anu dideudeul ku Ikatan Alumni (IKA) SMA Negeri 10 Bandung. 

Tabuh 12.00 eta acara teh lekasan. Tapi, suasana di SMA Negeri 10 Bandung masih rame, da aya keneh kagiatan lianna, nya eta Pemilu Ketua OSIS 2016-2017 tea. [] ram