Budak-budak Geus Jajaluk

Ilustrasi ku Mang Nanang. | sundaonline.com

Saliwatan tara jadi perhatian, tapi ana dipikir bet matak ngenes. Sok sawang, budak umur 4-7 taun jajaluk bari caludih. Aya nu di sisi jalan, aya nu dina angkot. Mun bareto nu kitu teh ukur di kota, ayeuna mah di pasisian ge aya. Malah nu ised gede ti dinya mah, nyeta-nyeta nurutan barudak gede. Jajalukna teh bari ngomong sakacumplang-sakacampling. Sakapeung matak teu pikangeunaheun kadengena.

Sihoreng cenah eta teh aya nu ngucuhkeun. Aya kolotna, aya jelema nu memang nyiar kipayah ku jalan kitu. Tangtu wae maranehna teh jalma-jalma nu teu boga rasa tanggung jawab kana atikan barudak. Teu mikirkeun nasib budak teh jaga kumaha.

Ceuk dina ‘media’, panghasilan jelema nu ngucuhkeun barudak sina jajaluk teh, lumayan oge. Dina sapoe bisa 200 rebu ti hiji budak. Paingan budak jajaluk beuki ngalobaan. Ari barudak nu dijadikeun tukang jajaluk teh rupa-rupa. Aya barudak ‘kapakan’ nu memang sapopoena di jalan bari teu puguh di mana indung-bapana. Aya oge nu meunang ngolo-ngolo atawa nyewa ti kolotna. Dina emproanana geuning ka orok-orok disewa dipake modal jajaluk.

Kawasna ieu teh balukar tina kamiskinan. Miskin harta miskin harti, atawa nya sangsara nya bodo. Meureun mun masyarakat urang sugih mukti bari ‘bareunta’ mah moal aya kajadian kieu teh. Barudak lir ibarat sirung. Nya maranehna jaga nu bakal ngalalakon dina kahirupan teh. Mun ti leuleutik geus diwarah sina jajaluk, rek kumaha jagana? Nu matak barudak teh kudu diatik sina jadi jalma nu siap tandang makalangan. Ieu pancen sarerea, kaasup para pamingpin .... [] Mang Nanang