Sepanduk Nilep Diantep Bae

Sepanduk nilep diantepkeun wae. Padahal eusina penting, nguarkeun pangajak ka balarea pikeun nulungan baraya nu kamusibahan di Garut, Jawa Barat. | sundaonline.com

Musibah Garut, Jawa Barat, keur jadi puseur perhatian balarea. Di mana-mana masarakat masang sepanduk, nguarkeun pangajak ka balarea pikeun ngabantu korban eta musibah. Eta peta teh kalintang hadena. Geus sakuduna urang tutulung ka nu butuh, tatalang ka nu susah, angot ieu ka nu keur nandangan lara ku alatan bencana alam nu mangrupa banjir bandang.

Ngan aya we nu matak kapiasem teh. Di wilayah Kacamatan Cangkuang, Kabupaten Bandung, aya sepanduk anu nilep. Pikeun nu teu apal kana eusina mah matak kerung macana. Enya, ku nilepna eta sepanduk teh, maksud jeung tujuan panitia moal katampa kalayan hade ku balarea. Cindekna, ku nilepna eta sepanduk teh, komunikasi antara panitia jeung balarea jadi gagal. 

Ceuk salah saurang warga di dinya, eta sepanduk nilep teh ku angin. "Da ayeuna mah sok hujan angin di dieu teh," pokna ka sundaonline.com, Saptu (8/10). Tangtu bae eta katerangan warga teh asup akal, da piraku eta sepanduk teh ngahaja ditilepkeun ku jelema, angot nu kasebut jelema waras mah. 

Anehna, eta sepanduk anu nilep teh tacan dilereskeun bae. Duka ku naon. Duka ngantosan kumaha deuih. [] sapu