Teu Aneh, Urang Sunda Ngukut Anjing

Rangga keur anteng ulin jeung anjing. | sundaonline.com

Rangga (4) kacida pisan resepna kana anjing. Ari geus ulin jeung anjing teh, eta anak bungsuna Iyan Mulyadi (30) teh sok anteng. Mun teu ditalingakeun mah, matak poho kana dahar jeung mandi. Harita oge, basa sundaonline.com ka imahna, di Desa Ciluncat, Kacamatan Cangkuang, Kabupaten Bandung, Rangga keur anteng ngagulanggaper anjing kukutan bapana di buruan. Si anjing teh diciuman, diakod, dikelek jeung sajabana. Aya kalana ditumpakkan atawa diborogod anjing teh. Ah, pokona mah dicoo we anjing teh sasuka hatena. 

Aya dua budak rumaja lalaki anu hookeun nempo peta Rangga kitu teh. Nu saurang mah nepi ka ngabirigidig. Lain geuleuh ku najisna cenah, tapi sieun ku anjing teh. 

Harita bapana Rangga keur taya di imah. Inyana keur moro ka leuweung jeung babaturanana. Enya moro bagong atawa babi. Morona make anjing. "Duka turunan ti saha, da pun anak mah hobi kana moro teh," cek Mang Amud (69), akina Rangga, anu harita kasampak keur nambal ban langgananana. "Ti aalit pun anak mah resep kana anjing," pokna deui bari ngabelengeh seuri. 

Mang Amud, akina Rangga. | sundaonline.com

Cek Mang Amud, baheula mah di lemburna loba nu ngukut anjing. Aya nu ngukut pikeun moro ka leuweung, aya oge nu sakadar pikeun ngajaga kaamanan imah. Matakna teu aneh ku urang Sunda anu ngukut anjing teh. Ka dieunakeun, ti saprak dug-degna perumahan, nu ngukut anjing teh ngurangan. Naha? "Seueur nu teu resepeun urang Sunda ayeuna mah kana anjing teh. Da apan najis cenah," Mang Amud netelakeun. 

Aya nu cedihan ka Mang Amud oge. Ngan ku Mang Amud teu digugu. Napsi-napsi bae, nu penting mah Mang Amud teu ngarugikeun batur. Ongkoh deui da apan Mang Amud mah geus ti baheula ngukut anjingna oge, samemeh lobana warga anyar di daerahna. "Barina oge, anjing teh masih sarua ciptaan Alloh," pokna daria. "Urang Sunda mah teu kudu aneh kana ngukut anjing teh, da dina carios Sang Kuriang oge digambarkeun ku Si Tumang tea," pokna deui bari ngabelengeh seuri. [] ram