Barudak téh Modal jeung Modél

Drs. H. Tédi Kurnia, S. IP, M. M. Pd. | sundaonline.com

Préstasi SMA Negeri 1 Margahayu, Kabupatén Bandung, teras nambihan. Dua tempat nu disayogikeun kanggo nampung piala, medali, piagem sareng layang pangajén lianna tos teu nyekapan. “Ku margi kitu, abdi saparakanca gaduh rencana badé ngalihkeun éta tempat ka aula,” saur Wakasék Kesiswaan SMA Negeri 1 Margahayu, Kabupatén Bandung, Drs. H. Tédi Kurnia, S. IP, M. M. Pd., ka nu nulis, sawatara waktu ka tukang. 

H. Tédi nétélakeun, ayana tempat majang piala, medali, piagem sareng layang pangajén lianna téh mangrupi salah sahiji bentuk aprésiasi kana rupi-rupi préstasi anu tos dihontal ku barudak SMA Negeri 1 Margahayu. Ku kituna, tamu sarta wali murid tiasa ningali putra-putrina anu tos nyangking préstasi. Tiap préstasi nu tos dicangking baris disérén-sumérénkeun dina waktosna upacara Senén sakantenan didokuméntasikeun. “Ayana bentuk aprésiasi samodél kitu téh ti saprak abdi dibenum janten wakasék kesiswaan, lima taun ka pengker,” H. Tédi ngajéntrékeun. “Dokuméntasina digilir, tiap aya préstasi nu anyar tangtos langsung didokuméntasikeun sareng dipajang. Ku cara kitu, barudak kamotivasi kanggo teras ngukir préstasi,” saurna deui.

H. Tédi ngécéskeun, barudak nu nyangking préstasi kawas Agung, Rizky, Naufal, sarta nu lianna, éta téh modal sareng modél nu mangrupi kareueus pikeun kulawarga katut sakola. “Modal kanggé Kabupatén Bandung, sareng modél kanggé tuladeun barudak nu sanésna,” H. Tédi nétélakeun. [] Endang GG