Kabingung antara Héjo jeung 'Pink'

Beuki dieu beuki hésé meuli gas anu tilu kilo gram téh. Dina ayana ogé mahal deuih hargana, da ku langka téa. Héséna téh lain cék konsumén wungkul. Dalah cék nu daragangna ogé hésé rék nyetok saloba-lobana téh. “Abdi ogé mung kaagéhan tilu tabung,” cék Pa Pomo, warga Sanggar Indah Banjaran, Kabupatén Bandung, anu pangsiunan ti Pos dan Giro, basa ngawangkong jeung nu nulis, Senen, 5 Desember 2016. “Padahal abdi nyetok tabung gas téh aya kana opat puluhna. Duka kumaha pijadieunana ieu téh,” Pa Pomo semu ngaheruk.

Ku héséna meuli gas, Pa Pomo jadi ngundakkeun harga ka palangganna. Tina biasa ngajual Rp 22 rébu per tabung gas anu tilu kilo gram, ayeuna mah jadi Rp 25 rébu. Tapi cék sasaha harga sakitu téh kaitung murah, da di tempat séjén mah Rp 28 rébu, malah aya nu nepi ka ngajual Rp 31 rébu. “Bageur wé Pa Pomo mah, henteu mangpang-meungpeung,” cék Ibu Sri ngacungkeun jempolna pikeun Pa Pomo. 

Tug ka wangkid ieu, balaréa ngarasa tacan nampa katerangan anu écés ti pamaréntah, ku naon gas anu tilu kilo gram jadi langka di pasaran. Naha éta téh akal-akalanana tukang dagang atawa saha? “Ari saurna mah mémang ti dituna sesah,” Pa Pomo ngécéskeun niru omonganna urang pangkalan, tempat Pa Pomo balanja gas. 

Duka naon nu dimaksud ‘ti dituna’ téh. Nu tangtu, upama rék meuli gas tabung pink anu 5,5 kilo gram mah teu hésé. Di mini market ogé nyampak gas anu tabung pink mah. Ngan hargana mahal. Loba anggota masarakat anu ngarasaeun eungap pikeun meuli gas anu tabungna pink téh. Tapi Ibu Sri curiga kana ayana pulitik dagang. Enya cenah kawasna mah nu matak tabung gas tilu kilo gram jadi langka téh sangkan masarakat mareuli gas anu tabungna pink. Atawa, bisa jadi, éta téh pulitik dagang sangkan masarakat daék meuli gas anu tilu kilo gram ku harga anu mahal. Jadi upama isuk jaganing géto éta harga gas anu tilu gram diundakkeun hargana téh geus moal matak nimbulkeun démo ti balarea. “Tapi, kétang, duka kumaha anu saleresna mah, da urang mah awam,” pokna. 

Nu puguh mah, masarakat miharep malar pamaréntah ulah meungpeun carang kana ieu pasualan. Sing hawatos ka nu masakat. [] Endang GG