Kéiray Setianugraha Juara Kolaseu jeung Peragaan Busana Nasional

Keiray Setianugraha basa nampa piala juara kolaseu dina Hari Ibu 2016
di TK Bhakti Bandung.

Para finalis peragaan busana nasional dina Hari Ibu 2016 di TK Bhakti Bandung. Ti kenca ka katuhu; Fadil, Farél, Kéiray, Alvino jeung Aqbil.

Sabada juara kahiji ngagambar jeung ngawarnaan wadah patlot dina Hari Kartini 2016, Kéiray Setianugraha, kapeto deui nyangking préstasi dina Hari Ibu 2016 kamari, di TK Bhakti, Jalan Sukarma Bandung. Tapi ayeuna mah préstasi nu dicangking ku Kéiray téh nyaeta juara harepan III dina pasanggiri kolaseu jeung finalis dina peragaan busana nasional. Sanajan teu jadi juara kahiji, Kéiray pohara atohna, da bisa miluan pasanggiri kalayan ahirna meunang piala ti kapala TK-na, Dra. Lies Siti Nurfaidah. 

Salaku sepuhna, Firman Setianugraha miwah Putri Santosa, kalintang reueusna ningali Kéiray daék miluan pasanggiri téh. "Ku ngiringan pasanggiri, Kéi bakal gaduh pangalaman batin anu in syaa Alloh aya mangpaatna kanggo kahirupanana jaga," cék Firman ka nu nulis, 28 Desember 2016, di padumukanana, Jalan Sukaleueur Bandung. "Perkawis janten juara atanapi henteuna mah sanés udagan. Nu utami mah pun anak teuneung ludeung heula kersa makalangan," pokna deui ngajéntrékeun. [] Endang GG