Muhamad Rizky Prima Juara Olimpiadeu Fisika

Muhamad Rizky Prima | sundaonline.com

Teu hésé, puguh pikaresepeun Fisika sareng Matématika mah. Héséna dina éta dua mata pelajaran téh puguh tangtangan anu matak asik. Kitu cék Muhamad Rizky Prima, Kelas XII-MIPA 1 SMA Negeri 1 Margahayu Kabupatén Bandung basa ngawangkong jeung nu nulis di rohangan kapala sakola, sawatara waktu ka tukang. 

Teu anéh seug Rizky bisa enjoy neuleuman Fisika jeung Matématika. “Pokona mah, urang kedah terang heula kana konsép dasarna, ngarah urang tiasa kénging solusina kanggé ngungkulan hiji sual. Upamina, dina pelajaran Fisika, apan seueur rumus dasar anu kedah kacangkem heula sateuacan urang ngahanca rumus sareng étangan salajengna,” éta anak kadua ti pasangan Bapa Toni Rahayu sareng Ibu As Nurena téh ngajéntrékeun. 

Ku karesepna “ulin” jeung Fisika atawa Matématika, Rizky teu asa-asa miluan rupa-rupa kompétisi. Hasilna, alhamdulillah, nyugemakeun, Rizky jadi juara 3 Olimpiadeu Fisika Tingkat Kabupatén (Kemendikbud) 2016, Juara 1 Lomba Cerdas Cermat PAI Tingkat Kabupatén Bandung (Kemenag) 2016, Juara 3 Pembukuan Akuntansi Tingkat Jawa Barat (Universitas Siliwangi) 2016, jeung Juara 3 Industrial Competition of Education Tingkat Bandung Raya (Universitas Widyatama) 2016. 

Saméméh asup ka SMA, Rizky ogé remen ngiringan pasanggiri tur jadi juara. “Abdi kantos lebet final dina Olimpiadeu Matématika PASIAD Pribadi School tingkat nasional. Abdi ogé kantos janten juara kadua lomba cerdas cermat Matématika sa-Bandung Raya sareng Banten ogé juara kadua lomba cerdas cermat Pendidikan Agama Islam. Teras, waktos SD, abdi janten juara umum di Sekolah Islam Terpadu Anni’mah, teras, waktos SMP, juara umum kadua,” pokna. 

Rizky ngemu cita-cita jadi insinyur sipil. “Abdi hoyong ngaronjatkeun pangwangunan di Indonesia,” cék Rizky. “Di Indonesia, utamina di daerah-daerah anu mencil, seueur kénéeh tempat sareng jambatan anu awon sareng ngabahayakeun,” pokna deui.

Ku kituna, Rizky peupeujeuh, salaku pelajar Indonesia kudu diajar kalayan soson-soson, sabab salaku generasi emas kudu bisa mawa ngaran hadé Indonesia ka mancanagara. “Pangaweruh sareng étika ogé kedah imbang, urang kedah pinter sacara pangaweruh ogé pinter dina hirup kumbuh,” Rizky nandeskeun.

Rizky ogé kabiruyungan asup kana 150 besar nu nampa béasiswa ti Telkom. Ku kituna, Rizky miharep bisa nuluykeun sakolana ka ITB tur jadi alumni nu nyongcolang di SMA Negeri 1 Margahayu. [] Endang GG