Muhammad Agung Rozaq Juara Olimpiade Kimia

Muhammad Agung Rozaq | sundaonline.com

Muhammad Agung Rozaq, kelas XII-MIPA 1, nyaéta salah sahiji siswa kareueus SMA Negeri 1 Margahayu Kabupatén Bandung. Piraku teu kitu, ieu putra tunggalna Bapa Haryono sareng Ibu Sunarti téh euyeub ku préstasi. Agung kungsi Juara 1 Olimpiadeu Kimia Tingkat Kabupatén Bandung (Kemendikbud) 2015, Juara 2 Olimpiadeu Kimia Tingkat Kabupatén Bandung (Kemendikbud) 2016, Juara 3 Diskusi Paradeu Cinta Tanah Air Tingkat Jawa Barat (Kementerian Pertahanan) 2016, ogé Juara 3 Industrial Competition of Education Tingkat Bandung Raya (Universitas Widyatama) 2016. 

“Ti aalit abdi resep ngiringan pasanggiri, sateuacan lebet ka SMA oge sok ngiringan kajuaraan olah raga ngojay, abdi paling resep ngojay gaya dada,” pokna ka nu nulis di ruangan kapala sakola, sawatara waktu kaliwat.

Agung midangdam jadi dokter. Katangén ku dirina yén di Indonesia masih loba nu merelukeun bantuan para dokter, utamana masarakat di Indonesia beulah wetan. Mémang enya ari dokter mah kawilang loba di Indonesia téh, tapi masih saeutik anu bener-bener daék ngabdikeun dirina pikeun kapentingan kasehatan masarakat Indonesia. Lolobana, cék Agung, dokter di Indonésia milih gawé di mancanagara atawa di pausahaan swasta batan milih ngabdi langsung ka masarakat. Ku kituna Agung gilig rék nuluykeun sakolana ka Fakultas Kedokteran Universitas Gajah Mada. “Indonésia meryogikeun generasi muda anu pinter anu tiasa ngamajukeun Indonesia,” cék Agung anu asup kana 150 besar pikeun nampa béasiswa ti ITENAS nu diayakeun ku Métro TV. [] Endang GG