Muhammad Naufal Mahardika Juara Némbak Sa-Asia Tenggara

Muhammad Naufal Mahardika | sundaonline.com

Basa ditepungan di sakolana, Naufal, Kelas X-MIPA 1 SMA Negeri 1 Margahayu Kabupatén Bandung, keur di Hanoi, Vietnam, ti awal Nopémber 2016 mula. Nu nulis kakara bisa nepunganana poé Senén, 21 Nopember 2016. “Di Vietnam abdi ngiringan kajuaraan régional cabang olah raga némbak sa-Asia Tenggara,” pokna ka nu nulis di juru rohangan guru. “Hanjakal, di ditu, abdi teu kenging medali emas,” éta lalaki jangkung tegep anu ngaran lengkepna Muhammad Naufal Mahardika téh tungkul sakedapan. Dina kajuaraan némbak 10 metér Air Rifle Match Team SEASA Vietnam 2016 téh Naufal ngan jadi juara kadua.

Tapi, tékadna pikeun ngélébétkeun Bandéra Mérah Putih dina kajuaraan internasional anggér ngagedur. Ku sabab kitu, Naufal boga targét, taun hareup dirina miharep diajak ku Pelatnas pikeun makalangan dina SEA Games tug ka bisa ngélébétkeun Bandéra Mérah Putih di Malaysia. 

Saméméh ka Vietnam, Naufal ka Koréa heula. “Di Koréa abdi sparing partner salami sasasih di training center, teras training camp sareng uji coba sareng urang Koréa kanggo persiapan PON Jabar, abdi diutus ku KONI Jawa Barat,” pokna. Hasilna, dina Kejuaraan Menémbak 10 Metér Air Rifle Match Team PON 2016 di Bandung, Jawa Barat, Naufal nyangking juara kahiji.

Saméméhna, Naufal Juara I 10 M Air Rifle Match Team Kejurnas Antar Pengprov 2016 di Bandung, Juara I 10 M Air Rifle Matrch Team Kejurnas Awang Faroek Cup 4 2016 di Balikpapan, Juara I 10 Metér Air Rifle Match Team Kejurnas Menembak Jabar Open 2016 di Bandung. Puguh wé, Naufal jadi euyeub ku élmu panemu tina éta rupa-rupa kagiatan téh, ogé nambahan jam terbang jeung pangalaman.

Naufal miluan olah raga némbak téh ti kelas VII. Indungna, Fardiah Syamsiyah, aktip jadi pangurus organisasi cabang olah raga némbak Perbakin. “Awalna mah abdi mung iseng, ngan lami-lami janten resep, dugi ka ahirna soson-soson latihan tiap wangsul sakola di Purwakarta,” cek éta anak kadua ti dua sadulur. 

Naufal lahir di Bandung. Ti saprak TK pindah ka Purwakarta. Tug ka kiwari, ku lantaran dines jadi pagawé negeri sipil, indungna masih nganjrek di Purwakarta. Di Bandung Naufal cicing jeung bapana, Yayan Suhérlan, nu digawé di BUMN. 

Ti leuleutik Naufal hayang jadi tentara Angkatan Darat jeung Kopasus. “Karesep abdi kana olah raga nembak sugan wé janten cukang lantaran kanggo ngawujudkeun cita-cita,” Naufal kebek ku pangharepan.

Naufal kalintang sugemana bisa jadi atlit némbak. “Abdi janten tiasa ka mancanagara, sareng, nu katingal ku abdi, jalmi nu tiasa ngélébétkeun Bandéra Mérah Putih téh mung présiden sareng atlit,” pokna. “Kamampuhan némbak di angka 10 ogé janten alesan abdi mikaresep kana olah raga némbak,” pokna deui. 

Nu miluan olah raga némbak masih kawilang langka. Matakna lolongkrang hadé pikeun Naufal ancrub kana éta olah raga. Di sakolana ogé tacan aya ékstra kurikuler olah raga némbak. Ku sabab kitu, Naufal latihan di imah baé saban mulang ti sakola. Dina waktuna latihan, angot di imah, teu perelu ngagunakeun jeung nembakkeun pélor. “Latihan abdi mah ngangkat beban sareng ngangkat senjata wé. Senjata nu sering digunakeun nyaéta senjata laras panjang kaliber 4,5 ngagunakeun pélor angin,” cék Naufal ngajéntrékeun. 

Awalna, Naufal ngagunakeun senjata nu sok dipaké moro manuk. Tuluy, ku palatihna diarahkeun kana widang préstasi, nya éta némbak sasaran bidang targét. “Awalna abdi mung dipasihan senjata anu jenisna pompa. Sabada aya kamajuan, abdi dipasihan nambut senjata ku pangurus cabang Purwakarta. Senjata nu ayeuna dianggé ku abdi nyaéta senjata standar internasional,” pokna deui bari tuluy nétélakeun yén Naufal betah sakola di SMA Negeri 1 Margahayu Kabupatén Bandung téh. Ku dirina karasa pisan pangrojong ti pihak sakola anu kalintang gedéna. [] Endang GG