Ngukir Préstasi, Ngutamakeun Publikasi

Dra. Ika Atika, M. M. Pd. | sundaonline.com

Wakasék Humas SMA Negeri 1 Margahayu, Kabupaten Bandung, Dra. Ika Atika, M. M. Pd., pohara hagetna basa nu nulis rék ngaékspos profil SMA Negeri 1 Margahayu Kabupatén Bandung téh. “Publikasi sakola téh kalintang pentingna, margi apan publikasi sakola téh geusan nguarkeun informasi anu aya di sakola,” saurna ka nu nulis, di rohangan dinesna, sawatara waktu ka tukang.

Ibu Ika nétélakeun, salah sahiji pancén Wakasék Humas téh ngapublikasikeun kagiatan sakola ka sakumna warga sakola sareng masarakat di saluareun sakola. Buletin sakola, pamplét sakola, paméran, website, média sosial, pon nyakitu koran, tabloid sareng majalah, éta téh média publikasi. 

Pamplét, saur Ibu Ika, nya éta média anu remen digunakeun ku SMA Negeri 1 Margahayu. Eta pamplét téh dibagikeun ka tamu nu sarumping pikeun studi banding ka SMA Negeri 1 Margahayu. Tangtos waé cenah eusi dina éta pamplét téh préstasi barudak SMA Negeri 1 Margahayu. 

Angot, Ibu Ika ngajéntrékeun, SMA Negeri 1 Margahayu remen dijadikan tempat pikeun rupa-rupa kagiatan ti luar kayaning pasanggiri, OSN, O2SN, Gelar Aksi Siswa (Galaksi) sarta kagiatan-kagiatan dines lianna. “Ku kituna, di ieu sakola aya rohangan multi média geusan majang poto-poto barudak anu nyangking juara. Nu dipiharep tina majang éta poto-poto téh malar sumanget barudak dina ngahontal préstasi teras ngagedur,” saurna. “Sajabi ti kitu, tamu anu sarumping ka éta rohangan tiasa ningali prestasina barudak di dieu. Eta ogé apan publikasi,” saurna deui. 

Média sosial kayaning facebook ogé mangrupi bagian penting dina publikasi. Malah, SMA Negeri 1 Margahayu teu asa-asa nyimpaykeun tali mimitran sareng média, boh média citak boh média éléktronik. 

Lian ti éta, dina ping 22-23 Desember 2016, SMA Negeri 1 Margahayu ngayakeun paméran. Dina éta paméran digelar karya-karya barudak pikeun némbongkeun ka masarakat yén barudak SMA Negeri 1 Margahayu ogé parigel dina nyieun prakarya nu pikareueuseun balaréa. [] Endang GG