Putri Santosa Juara Dikurudung

Putri Santosa dina Pasanggiri "Memakai Hijab" dina Hari Ibu 2016, di TK Bhakti Bandung.

Dina Hari Ibu 2016, TK Bhakti Bandung ngayakeun rupa-rupa pasanggiri. Ngan, unikna, éta pasanggiri téh lain pikeun barudak wungkul. Orang tua murid-na ogé ku panitia diajak aub kana pasanggiri. Salasahijina nyaéta pasanggiri "Memakai Hijab". Tangtu baé éta pasanggiri téh pikeun indung-indungna barudak. Putri Santosa, indungna Keiray Setianugraha, ogé miluan éta pasanggiri. Tadina mah wegah cenah jadi patandang dina pasanggiri memakai hijab téh. Angot dina éta pasanggiri memakai hijab téh henteu kaci ngaca. Ku lantaran aya dorongan ti carogéna, Firman Setianugraha, Putri ngawayahnakeun aub jadi patandang.

Aya salapan patandang dina éta pasanggiri téh. Puguh wé degdegan mimitina mah basa maju ka panggung téh, da puguh tara miluan pasanggiri. Tapi sanggeus der mah, henteu ratug teuing jajantung téh. Putri bisa husu kana naon nu kudu dipilampahna salila makalangan di panggung. Alhamdulillah, teu disangka-sangka, dina témpona pangumuman hasil pasanggiri, Putri Santosa kapeto jadi juara kahiji. "Kantenan wé kacida bingahna," cék Putri Santosa ka nu nulis. 

Lain pédah nampa piala, nu matak atoh téh nyaéta ku bisana nyorang éta pasanggiri. Leuwihna ti kitu, Putri Santosa bisa méré conto ka anak-anakna. "Sugan wé pun anak kamotivasi," pokna ditungtungan ku imut ngagelenyu.

Ku kituna, Putri Santosa kalintang nganuhunkeunana ka Dra. Lies Siti Nurfaidah saparakanca nu ngaluluguan ayana pasanggiri pikeun orangtua murid di TK Bhakti Bandung. "Mugia TK Bhakti suksés sapapaosna," cék Putri Santosa ngadu'akeun. [] Endang GG