RI NAGARA KORUPSI?

Kurnia maké kaos oblong hideung keur ngaladénan konsumenna di kafé. | sundaonline.com

Basa ngumpul di hiji kafé, di Jalan Gandasari, Kabupatén Bandung, 30 Désémbér 2016, aya salasaurang palayan anu jadi perhartian kuring. Eta palayan téh lalaki, budak ngora anu keur meujeuhna belekesenteng. Hadé cara manéhna ngaladénan konsumén téh. Cingceung. Rikat. Soméah. Estu pikaresepeun konsumén. Sanajan dangdananana mah urakan kawas anak band. Atuh da ceulina sabeulah maké anting. Calanana jeans biru, bajuna kaos oblong hideung anu di hareupna gambar Iwan Fals. Kaosna gé dikaluarkeun deuih.

Ari nu jadi perhatian kuring nyaéta waktu manéhna nukangan bari ngaladénan konsumén nu séjén. Dina kaosna téh ngajeblag tulisan anu unina: RI NEGARA KORUPSI. Sajongjonan mah kuring kerung nempo éta tulisan téh. Ayeuna mah bangsa urang téh waranian. Kitu cék gerentes haté kuring. Di jamanna orde baru mah, nyaéta jamanna Pa Soeharto janten presidén, arang langka jalma nu kumawani nyarita kitu téh, angot nepi ka ditulis dina kaos modél kitu mah. 

Ayeuna mah, duh, abong biwir teu diwengku, balareé nyarita téh sakarepna-sakarepna. Angot di média sosial mah. Silih hina, silih ceceléh, silih poyok, silih cawad, geus ngabaju. Malah nyeceléh nu jadi pamingpin nagara ogé dipaké dangdanan. Leuwihna ti kitu, moyok batur, nyawad pamingpin, ngahina bangsa jeung nagara sorangan, kawas dianggap ‘seni’ anu hayang dipikareueus ku balaréa. Buktina éta tulisan dina kaos palayan kafé téa. Sanajan enya kangaranan korupsi di nagara urang taya euihna, tapi, salaku warga anu nyaah ka nagarana, moal enya téga nyebutkeun Republik Indonesia (RI) téh nagara korupsi. 

Korupsi mah kalakuan sawatara jalma anu mentingkeun kapentingan dirina sorangan, teu daék nolih kana kapentingan balaréa bari ngahalalkeun sagala cara. Jalma anu korupsi—anu sok disebut koruptor—meujeuhna rék disebut bangsat atawa rampog gerot ogé. Tapi, nagara tempat cicingna koruptor ulah dituding korupsi, da nagara mah teu korupsi, malah duit nagara anu sok dikorupsi ku koruptor. Saha ari koruptor téh? Hih, sidik éta jalma anu sok korupsi téa! 

Jadi, teu merenah éta tulisan anu unina RI NEGARA KORUPSI téh. Kréatifna mah kréatif pangusaha anu nyieunan éta kaos téh. Manehna geus bisa mencari kesempatan dalam kesempitan téa. Hanjakalna éta tulisan masih kurang asak jeujeuhan. Sabab, éta tulisan bisa jadi cicirén yén bangsa urang geus henteu mikareueus bangsana sorangan, nagarana sorangan, atawa lemah caina sorangan. Padahal maksud éta tulisan can karuhan rék “nyacampah” bangsa sorangan. Kurnia, palayan kafé téa, nétélakeun yén di nagara RI téh loba koruptor. “Janten koruptor anu korupsina mah, sanés RI,” cék Kurnia bari ngabelengéh seuri. Barina gé éta kaos geus lila dipibandana. Hideungna éta kaos gé geus teu meles. Ngan henteu wé ari nepi ka belél jeung soék mah, matak masih dipapaké gé. 

“Tapi da abdi mah mésér ieu kaos téh pédah aya gambar Iwal Fals wé,” Kurnia ngaku resep ka Iwan Fals. “Ongkoh deui seratan dina ieu kaos masih nyambung sareng situasi ayeuna,” pokna deui. Maksudna? Enya cenah apan tug ka wangkid ieu di nagara urang masih loba koruptor! [] Endang GG