SMA Negeri 1 Margahayu, Kabupatén Bandung, Sakola Modél, “Titik Pantau” Adipura

Wangunan SMA Negeri 1 Margahayu, Kabupatén Bandung. | sundaonline.com

Lapangan SMA Negeri 1 Margahayu, Kabupatén Bandung. | sundaonline.com

Sanaos nembé sawatara minggu janten Kapala SMA Negeri 1 Margahayu, Drs. H. Aa Sudaya, M.Pd., ngaraos teu bireuk ka ieu sakola anu perenahna di Jalan K. H. Wahid Hasyim No. 387 Kabupatén Bandung. Angot upami nyarioskeun perkawis préstasina. Naha? “Atuh da préstasina SMA Negeri 1 Margahayu mah tos kasohor, utamina kanggé SMA di Kabupaten Bandung. Kantenan sawatara taun ayeuna SMA Negeri 1 Margahayu kapeto janten sakola modél,” saurna ka nu nulis, di ruang dinesna, sawatara waktos ka pengker. 

Harita, H. Aa disarengan ku Wakasék Kesiswaan, Drs. H. Tédi Kurnia, S. IP, M. M. Pd., Wakasék Humas, Dra. Ika Atika, M. M. Pd., Sékrétaris Bidang Kurikulum, Talimin, S. Pd., Wakasék Sapras, Asép Tardia, S. Pd. Mung, Wakasek Kurikulum, Rusmiati, S.Pd., M. Si., nuju dines ka luar. 

Suasana di lanté dua SMA Negeri 1 Margahayu, Kabupatén Bandung. | sundaonline.com

H. Aa ngajéntrékeun, pikeun janten sakola modél téh henteu gampil. Ngan sakola-sakola anu nyongcolang baé anu bakal kapeto janten sakola modél. Saméméhna, SMA Negeri 1 Margahyu diancokeun janten sakola RSBI, teras janten sakola standar nasional (SSN). Sanaos SSN, ieu sakola mampuh némbongkeun préstasina tug ka janten kareueus Diréktorat Kabupatén Bandung.

Dina widang akademis SMA Negeri 1 Margahayu tos kalintang seueur préstasina. Seueur siswa nu nyongcolang dina rupi-rupi mata pelajaran, boh di tingkat nasional boh di tingkat internasional. “Sawatara taun ka pengker, aya siswa SMA Negeri 1 Margahayu anu juara dina pasanggiri Bahasa Jepang di tingkat nasional, tug ka tiasa miang ka Jepang,” saur H. Aa kalayan reueus.

Dina widang olah raga, SMA Negeri 1 Margahayu janten puseurna atikan olah raga sépak bola. Sawatara pamaén PERSIKAB jebulna ti SMA Negeri 1 Margahayu. Basa PON XIX Jawa Barat, salah saurang siswa SMA Negeri1 Margahayu nu namina Naufal, kabiruyungan kenging medali emas. Kantenan wé, sanés warga SMA Negeri 1 Margahayu wungkul anu reueus téh, warga masarakat Kabupatén Bandung sareng Jawa Barat ogé ngiring reueus. “Malih mah Naufal tos janten asét nasional,” saurna. 

Kalihna ti éta, SMA Negeri 1 Margahayu sacara umum nyangking pangajén Adiwiyata ti Bupati Bandung, Gubernur Jawa Barat, pon nyakitu sacara nasional. Ku kituna ieu sakola kenging aprésiasi ti Menteri Pendidikan dan Kebudayaan. Dina taun 2015, Kepala SMA Negeri 1 Margahayu ka Jakarta kanggo nampi pangajén ti Bapa Anies Baswédan anu harita masih janten Menteri Pendidikan dan Kebudayaan.

Ku lantaran kitu, basa Kabupatén Bandung gilig pikeun nyangking pangajén Adipura, SMA Negeri 1 Margahayu kapeunteun janten “titik pantau”-na. “Hal ieu ogé janten kareueus, margi SMA Negeri 1 Margahayu payus dikapayunkeun kanggé nampi pangajén Adipura,” H. Aa nandeskeun. “Méh saban dinten Senén, ari témpona upacara, salaku Kapala SMA Negeri 1 Margahayu, abdi nampi piala-piala ti murangkalih anu juara, boh dina widang akademik, pon nyakitu dina widang non-akademik,” saurna deui. 

Kapala SMA Negeri 1 Margahayu, Drs. H. Aa Sudaya, M. Pd. | sundaonline.com

Kapala SMA Negeri 1 Margahayu, Drs. H. Aa Sudaya, M. Pd., katut réngrénganana, Wakasék Kesiswaan, Drs. H. Tédi Kurnia, S. IP, M. M. Pd., Sékrétaris Bidang Kurikulum, Talimin, S. pd., Wakasék Sapras, Asép Tardia, S. Pd., sareng Wakasék Humas, Dra. Ika Atika, M. M. Pd. | sundaonline.com

Matakna teu anéh seug animo masarakat ka SMA Negeri 1 Margahayu tambih positip. Teu anéh deuih upami jumlah calon siswa nu dalaptar dina taun ajaran 2016 langkung seueur batan taun 2015. Seueur siswa lulusan SMA Negeri 1 Margahayu nu lebet ka perguruan tinggi negeri (PTN). Malih mah dina taun 2015, aya tujuh siswa nu katampi di akademi militér. Hal ieu janten kareueus anu luar biasa, margi apan teu gampil hoyong lebet ka akademi militer téh, angot saénganana sa-Indonesia.

H. Aa ogé ngaraos kalintang bingahna ku ayana karukunan sareng kakompakan di antawis warga SMA Negeri 1 Margahayu. Saurna, karukunan sareng kakompakan téh mangrupi cikal bakalna préstasi. “Pokona mah, SMA Negeri 1 Margahayu téh sakola juara anu dina tiap aspékna mampuh nempatan posisi pangluhurna di Kabupatén Bandung,” saurna. [] Endang GG