Wilujeng, Sanés Wilujeung!

Ngalarapkeun aksara "e" jeung "eu" masih pabaliut. Kawas nu kajadian di Blok Témpé, Jalan Kopo Bandung, Saptu, 3 Desember 2016. | sundaonline.com

Meureun enya hese mana kitu oge. Naon tea? Enya eta diajar basa Sunda. Geura tingali di Blok Tempe, Jalan Kopo Bandung. Mani jentre hesena masarakat dina ngalarapkeun basa Sunda anu bener. Ari maksudna mah hade. Warga masarakat Blok Tempe seja ngabageakeun ka sing saha bae anu datang ka wewengkon Blok Tempe. Apan unina dina gapura teh kieu: "WILUJEUNG SUMPING DI BLOK TEMPE". Pernahna di RW 01 Kalurahan Babakan Asih, Kacamatan Astanaanyar, Kota Bandung.

Pikeun nu ngarti kana basa Sunda mah, maca eta tulisan teh matak kapiasem. Atuh da sidik kasalahanana, nya eta nulis kecap "wilujeng" jadi "wilujeung". Memang teu aneh kasus sarupa kitu teh. Teu kurang-kurang urang Sunda pituin anu pabaliut lebah ngalarapkeun "e" jeung "eu". Enya, pabaliut lebah nuliskeunana. Ngan, anehna, eta kasalahan teh bangun taya euihna.

Duka nepi ka iraha eta kecap "wilujeung" rek terus ngajeblag dina gapurana Blok Tempe. [] ram