Bahayana Kupat nu Dibungkus ku Plastik

Ieu kupat matak jadi mamala upama dibungkus ku palastik. | sundaonline.com

Abong jaman geus robah, kiwari mah bungkus lontong atawa kupat ogé salin ku plastik, lain ku daun cau. Kituna téh lain di kota wungkul deuih, di pakampungan ogé sarua maraké bungkus tina plastik. Pajarkeun téh leuwih praktis. Meuli plastik mah kari jung baé indit ka warung. Lamun maké daun cau mah kudu indit ka pasar, da geus langka warung nu ngajual daun cau mah.

Tah, ieu cara mungkus kupat anu bener. | sundaonline.com

Padahal, Dokter OZ nétélakeun, peta kitu téh bahaya pikeun kaséhatan. Plastik anu dipaké bungkus kadaharan kayaning lontong atawa kupat jeung sajabana ti éta ngandung zat kimia anu bisa ngabalukarkeun panyakit kanker jeung mandul. Angot dina lontong atawa kupat mah, plastikna milu digodog. Lila deuih dina godoganana téh, da apan tina béas nepi ka jadi kupat téa. Ku lilana dina godogan, geus pasti zat-zat anu bahaya tina plastik téh nyerep kana kupat anu bakal jadi kadaharan balaréa. 

Ku sabab kitu, balik deui kana cara jaman baheula téh taya salahna, angot demi kaséhatan awak urang mah. [] Endang GG