Jalan Longsor Geus Dioméan, Ngan Ramijud Kénéh

Sanggeus dioméan, sisi jalan anu ngagawir kana susukan téh jadi pangulinan barudak.
| sundaonline.com

Warga Sanggar Indah Banjaran muji sukur ka Gusti Nu Mahaasih, lantaran jalan ruksak di RT 01 RW 06, Désa Nagrak, Kacamatan Cangkuang, Kabupatén Bandung, geus dioméan, ahir taun 2016. Saméméhna éta jalan téh ruksak parna, nya éta ku longsor anu kajadianana waktu aya angin puyuh téa. (Baca: http://www.sundaonline.com/2016/07/deukeut-ka-pamarentah-can-karuhan-genah.html).

Puguh wé patalimarga téh kaganggu. Warga nu maké mobil mah teu bisa asup, da jalanna ditutup. Atuh mobil anu biasana ngaliwat ka dinya mah jadi nguriling. Ku sabab kitu meujeuhna upama warga Sanggar Indah Banjaran rék nepi ka sukuran téh. 

Saméméh dioméan, ieu jalan anu longsor henteu bisa diliwatan ku mobil. | sundaonline.com

Duka méakkeun waragad sabaraha pikeun ngoméan éta jalan ruksak anu kurang leuwih 50 meter pasagi téh. “Da nu ngadangdosanana ogé pamaréntah désa,” cék warga di dinya anu narah disebut ngaranna. 

Sanajan kitu, ari ngudag kasugemaan mah can nepi, cenah. Da jalan téh can alus pisan. Masih ramijud. Upama hujan pinuh ku leutak. Duka bakal dialusan deui duka moal éta jalan téh. Ari kahayang warga mah, pamaréntah ulah asa-asa ari rék ngaraharjakeun ra’yat téh. “Aéh, kétang, sakieu ogé untung, nya,” pokna deui bari ngarérét ka barudak anu keur arulin di sisi jalan anu ngagawir kana susukan. [] Endang GG