Kembang Ros Ungu

Ilustrasi tina daunbuah.com

Can kungsi tepung jeung jinisna mah. Tapi ari ngobrol mah geus mindeng dina pésbuk. Ngobrol jeung inyana asa ngobrol jeung nu geus loma. Padahal can lila wawuh téh. Basa Sundana alus. Kacipta téh dina kieuna soméah jeung galécok. Da éta wé ngobrol dina pésbuk téh ujug-ujug nyambung jeung wanoh. 

Tina obrolan kateuleuman, inyana téh ibu guru, ngajar di salah sahiji SD di Klungkung Bali. Umurna kira-kirana opatpuluhan. Geus rumah tangga, boga anak jeung salaki. Ceuk pangakuanana, mukim di Bali ti taun 1991. Puguh aslina mah ti Cigalontang Tasik. Bubuara di Klungkung asalna nuturkeun salaki. Tuluy dibenum jadi guru PNS, da boga ijazah SPG jeung PGSD. Nepi ka kiwari geus dua puluh lima taun meureun ngumbara jeung boga KTP Bali téh.

Nilik tina fotona, éta ibu guru téh kaasup basajan. Ngaranna Tuti Herlinawati. Dikurudung jeung maké kacamata. Naon istiméwana? Aya nu matak kataji. Pan inyana téh geus lila ngumbara di Bali. Urang apal, ari Bali téh boga ciri mandiri nu kuat, boh dina budaya boh dina agama. Tah, Tuti mah panceg dina kasundaanana. Geus puguh soal aqidah mah, tetep pageuh dina kaislamanana.

Dina soal basa, Tuti angger maké basa Sunda di lingkungan kulawarga mah. Utamana cenah ngarah barudakna bisa Basa Sunda. Sok komo keur aya di lembur deungeun nu ngabogaan basa sorangan. Ieu alus pisan. Pan di Tatar Sunda mah teu saeutik kulawarga Sunda nu basa ibu (basa sapopoé di imah) lain Basa Sunda, tapi basa Indonésia. Ceuk Tuti, Basa Sunda mah kudu dipraktékkeun di imah, da lamun teu di imah di mana? Basa Indonésia onaman bisa kapanggih dina pergaulan sapopoé.

“Pangpangna mah pun biang sareng sepuh di lembur seueur nu teu tiasa basa Indonésia, janten upami uih ka lembur supados pun anak tiasa komunikasi sareng nini akina...” ceuk Tuti.

Ditanya soal naha bisa betah di lembur deungeun nu kasang tukangna béda jeung di lembur sorangan, Tuti nandeskeun, utamana mah lantaran saling toléransi, cenah.

“Betah di Bali téh?“

“Betah... Mung sakali-kali mah sok rajeun tibelat ka lembur...” walon ieu ibu guru téh.

Tuti Herlinawati nu dina pésbukna make gambar kembang ros ungu duka nepi ka iraha ngumbara di Bali. Didungakeun téh sing betah bari tetep panceg dina kasundaanana. Utamana mulasara Basa Sunda, sangkan langgeng ayana.... Cag. [] Mang Nanang