Mun Roko Undak Hargana

Mang Andi, tukang kupat tahu di Bumi Parahyangan Kencana, Kabupatén Bandung, jangji rék eureun ngaroko, upama roko geus jadi 'barang mahal'. | sundaonline.com

Geus teu gujrud deui ayeuna mah perkara rék ngundakkeun harga roko téh. Tapi, lamun nepi ka kajadian, kumaha nya? Kawasna, jalma cacah kuricakan anu nyandu kana roko bati kumétapna seug roko undak hargana jadi barang mahal. Dina mangsana kitu, roko bakal jadi simbul jegudna hiji jalma, sabab anu mampu meulina ukur jalma jegud. Ku lobana nu ngaroko di hiji tempat ngandung harti lobana jalma jegud. Beuki loba jalma jegudna, beuki saeutik jalma anu merelukeun surat keterangan tidak mampu (SKTM), raskin, askéskin jeung sabangsana. Nu ngantay rék nyokot bantuan langsung tunai (BLT) ogé nyaeutikan. 

Kolot anu ngaroko bakal éra upama telat atawa teu mayar iuran sakola anakna. Piraku meuli roko bisa, ari mayar iuran sakola anakna teu bisa. Jalma cacah bakal geuwat mareuman rokona upama katohian keur ngaroko, padahal manéhna can mayar iuran sakola anakna mangbulan-bulan. Pasar tradisional, terminal, halteu beus, jeung tempat-tempat umum lianna anu biasa diburu ku masarakat leutik moal mulek ku haseup roko, da apan jalma leutik teu mampuheun meuli roko. Sanajan kitu, jalma jegud teu bisa sagenahna ngaroko di mana waé. Manéhna angger kudu apal kana tata-titi. Etika kudu diperhatikeun. Tong padu melenyun ngudud di mana waé abongkéna loba duit. Upama ngarempak étika, manéhna bakal disebut jalma belegug (teu apal kana tata-titi) atawa jalma jegud gedé hulu. Bayangkeun, huluna gedé kawas togé. Héhéhé.... Amit-amit.

Cindekna, upama pamaréntah rék ngundakkeun harga roko, nya der waé undakkeun. Ulah sieun nimbulkeun pangangguran, da ieu mah lain nutup pabrikna. Barina ogé, seug pamaréntah nepi ka wani nutup pabrik roko moal ujug-ujug nimbulkeun kasangsaraan pikeun bangsa jeung nagara. Nu puguh mah bakal alus pikeun pangwangunan ahlak. Apan timbulna candu kana miras jeung narkoba téh umumna tina barudak resep ngaroko. Pangna barudak resep ngaroko ku sabab dicontoan ku kolotna. Pangna loba kolot nyandu kana roko ku lantaran loba nu dagangna. Pangna loba nu dagang roko, apan sidik loba pabrikna. Pangna loba pabrik roko ku sabab pamarentah can panceg imanna yén merokok membunuhmu!

Enya kudu panceg ari boga niat hadé. Ulah mancla-menclé. Angot boga karep nga-révolusi méntal. Ku pancegna niat hadé, nyandu kana roko ogé bakal eureun, sanajan kasebutna urang jegud—mampuh meuli roko. [] Endang GG