Tilu Poé Nyeri Cangkéng Sirna ku Daun Sirsak jeung Kumis Ucing

Daun sirsak sareng daun kumis ucing ubar mujarab kanggé nyeri cangkéng.

Baraya kantos nyeri cangkéng? Atanapi nuju nyeri cangkéng? Pokona mah supados henteu nyeri cangkéng, mangga cobian ngaleueut cai godogan daun sirsak sareng daun kumis ucing. Sanaos kasebatna ubar kampung, tapi éta daun mujarab. Sanés sisiwo. Ieu mah kaalaman pisan ku sim kuring. 

Carana? Dua belas lambar daun sirsak semu kolot sareng tujuh lambar daun kumis kucing ditambihan ku akarna sakedik diwasuh sing bersih, teras digodog ku cai lima gelas dugi ka caina kantun dua satengah gelas. Tos kitu mah antepkeun wé sina tiis. Tos tiis teras dileueut. Dua satengah gelas téh tilu kalieun ngaleueut, nyaéta énjing-énjing, siang sareng sonten. Sakali ngaleueutna kirang langkung tilu parapat gelas. 

Teraskeun ngaleueutna saban dinten dugi ka damang nyeri cangkengna. Pangalaman sim kuring mah, dinten katilu ngaleueut cai godogan daun sirsak sareng daun kumis ucing téh tos karasa mangpaatna, rasa nyanyautan sareng jejenghakan dina cangkéng téh sirna. Padahal nyorang nyeri cangkéng téh aya kana dua sasihna. Teu percanten? Geura cobi buktoskeun ku nyalira. [] ram