Hukum anu Mutlak

Batara Kresna reinkarnasina Rama. | newmahabharata.blogspot.co.id

Dina Kitab Ramayana kacaritakeun Bali geus nyorang tapabrata anu pohara hesena kalayan jucung. Ku kituna Bali nampa kaistimewaan ti Nu Maha Kawasa. Sing saha bae anu padungdung ngalawan Bali, sawareh tina kakuatanana baris leungit jadi milik Bali. Puguh we kakuatan Bali beuki nambahan, ari kakuatan nu jadi lawanna kalah ka ngurangan. Ku sabab kitu, Sugriwa, musuhna Bali, teu weleh eleh saban padungdungan jeung Bali.

Rama apaleun kana eta kaistimewaan Bali. Basa Sugriwa ngumaha ka Rama, Sugriwa ditulungan ku Rama. Dina hiji waktu Rama nyumput tukangeun hiji tangkal pikeun ngaleupaskeun jamparingna ka Bali. Basa keur sakarat, Bali nyarita ka Rama: “Kuring asa can kungsi nyieun kasalahan ka anjeun. Ku sabab kitu, anjeun kudu nampa ganjaranana tina kalakuan anjeun dina kahirupan nu bakal datang.”

Singkatna carita, Rama reinkarnasi jadi Batara Kresna, Bali jadi anggota suku Bhil. Sawatara waktu sabada perang campuh Mahabharata, Batara Kresna kulem di leuweung bari numpangkeun sampeanna. Dina dampal sampeanna aya tanda lotus anu ngagurilap upama katojo ku panon poe. Basa anak buah suku Bhil ngulampreng ka palebah dinya, eta tanda lotusna Batara Kresna anu ngagurilap teh katingalina kawas panon uncal. Teu diengkekeun deui, manehna langsung ngabelesatkeun jamparingna. Barang disampeurkeun, eta suku Bhil teh ngarenjag, manehna sadar yen dirina geus milampah kasalahan anu pohara gedena. Cong eta suku Bhil teh ngahormat ka Batara Kresna anu nuju sakarat. Manehna menta hampura ka Batara Kresna. 

Puguh we ku Batara Kresna eta suku Bhil teh dihampura kalayan dijelaskeun yen eta kajadian teh minangka wawales tina kajadian baheula basa Rama mateni Bali tea. “Anjeun mah teu salah,” saur Batara Kresna ka suku Bhil. Hukum karma teh mutlak ayana. [] Endang GG