UNGKLUK

Ilustrasi | SINDONews

Umur 15 taun geus jadi ungkluk—atawa PSK mun ayeuna mah—kitu ceuk dina TV. Dilenyepan, tangtu ieu téh jero-jerona mah lain kajurung ku napsu sahwat, tapi ukur kapaksa. Bisa jadi lantaran bakat ku butuh keur ngabélaan beuteung.

Nyiar kipayah jaman kiwari kawilang hésé. Boh dugung-dagang, boh buburuh. Komo mun bari teu boga kabisa atawa kaahlian mah. Ninggang di awéwé boga banda nu bisa dijual, nyaéta ‘palawangan’ nu sabenerna mah kudu didama-dama. Nya meureun bakat ku kapaksa mah wayahna dijual, da loba ieuh lalaki nu daék meuli. Komo mun éta awéwé téh bari alus rupa. Geus tangtu kana payuna. Angot dirojong ku prostitusi onlén. Kalolobaan jadi ungkluk kasang tukangna masalah ékonomi. Maranéhna ogé sadar yén éta téh pagawéan hina bari gedé pisan risikona. Upamana katarajang virus HIP, atawa baréto mah sohor aya panyakit rajasinga nu balukarna ngaruksak kana awak.

Jadi ungkluk tangtu lain cita-cita. Mémang aya ogé nu niat ngadagangkeun awak lantaran ngarasa geulis jeung populér tur hargana bisa puluhan juta sakali ngagolér. 

Lian ti hina jeung gedé risiko, ungkluk téh sasatna teu boga harga diri dina keur ngalayanan lalaki mah. Kaharti, pan manehna téh geus dibeuli. Jadi rék suka rék henteu wayahna kudu nurut kana kahayang nu meuli. Sanajan aya rasa ijid jeung geuleuh gé. 

Sacara kamanusaan ungkluk téh kudu dipikarunya. Memang tina jihat susila manéehna téh goréng. Tapi boa aya kénéh sisi hadéna. Upamana, kitu sotéh lantaran ngabélaan kolot atawa anak. Lebah dieu mung Mantenna nu uninga. Urang mah sakadar ningali ku panon lahir... [] Mang Nanang