Mun Sora Petasan Eléh ku Hitut

Ilustrasi | news.detik.com

Ari sugan téh di Kabupaten Bandung wungkul ayana barudak nu sok maraén petasan dina bulan Romadon téh. Geuning di tempat séjén ogé aya. Apal kitu téh dina médsos. Jumaah, 26 Mei 2017, tabuh 9 peuting, Erwin Wahyudi, mostingkeun statusna di pésbuk anu unina kieu, “Mudah-mudahan saha waé nu jadi produsén merecon sing pinanggih jeung apés, jieunanana sing ngabeledug di jero imahna sorangan!” 

Méh sakedét nétra, éta status téh di-like ku 45 urang, ogé dikomén ku 45 urang. Dina koménna aya nu nga-aamiin-keun aya ogé nu nyalahkeun. “Ih, lepat atuh du’a téh,” cék Adé Satia, wiraswastawan anu lulusan Institut Téknologi Bandung. 

Tangtu waé bawaning ku keuheul pangna Erwin Wahyudi nyieun status sarupa kitu téh. “Jajantung ampir-ampiran coplok tina éngsélna, basa keur tarawéhan mireng nu ngabeledug di pipir masjid. Duh, nyaan, reuwasna lain bobodoan tadi mah. Maenya isukan kudu peré tarawéhan? Teungteuingeun mun dina enyana téh. Gusti, kobulkeun pamundut abdi. Aamiin....” cék éta urang Tasikmalaya, Jawa Barat.

Kakeuheul Erwin dilelempeng ku Dédé Suryana anu dumuk di Jakarta. “Sing hujan ageung, teras banjir, teras merconna kakeueum, teras teu kaical da baseuh, ari meledug mah hariwang bilih ka tatanggina reuwaseun,” pokna.

M. Dada BZ, urang Yayasan Kabudayaan “Sawala Kandaga Kalang Sunda”, Bandung, ngélingan, “Nu dihawatirkeun téh mun ngadunga nu goréng sok malitek ka nu deukeut jeung urang, budak misalna nu ngalakukeunana, alusna mah nya ngadunga sing insap wé boh anu nyieunna atawa anu ngadurukna.”

Malah, sastrawan moyan, Tatang Sumarsono, ogé mairan. “Uing mah ngadunga téh, mugi-mugi produsén merecon sareng konsuménna sing karénging hidayah. Upami keukeuh waé badé ngadamelan, dagang, sareng nyeungeut merecon, mugi-mugi sorana teu langkung tarik batan hitut nu dagangna, héhéh....” pokna.

Lamun sora petasan teu leuwih tarik batan hitut nu dagangna, kawasna moal matak ngaganggu pikeun Ibu Djamilah Rostini (73) ogé. Da salila ieu nu matak asa kaganggu téh ku sorana anu matak ngareuwaskeun. “Ibu mah sok sesek ari kenging kareuwas téh,” saur éta warga Sanggar Indah Banjaran, Kabupatén Bandung, anu kagungan panyawat asma. “Kantenan pun incu anu pangalitna mah sok sawan ari nguping sora petasan téh,” saurna deui. [] Endang GG