Bau Hitut Gedé Paédahna

Ilustrasi | viva forum

Di urang mah, utamana di Tatar Sunda, jalma nu katohian hitut téh sok digeuhgeuykeun, disalengseurikeun, malah aya nu nepi ka dicarékan, da dianggapna teu sopan. Béda jeung kabiasaan masarakat Barat. Di nagara maranehna mah, hitut, boh anu disada boh anu melepes, di pasamoan ogé moal pada ngageuheuykeun atawa pada nyeungseurikeun, sumawonna nepi ka pada nyarékan mah. Sabab, cék Davé Colés, urang Amerika nu lila cicing di Bandung Kalér, nahan hitut téh henteu hadé pikeun kaséhatan awak urang. Upama jalma katarajang panyakit hésé hitut, caritana bakal panjang, ka rumah sakit mah bisa jadi nepi ka kudu nyorang dioperasi. Matakna, teu hadé nahan pihituteun téh. 

Malah, saéstuna, para ahli kaséhatan nétélakeun yén hitut téh pohara gedé paédahna pikeun kaséhatan awak urang, sabab hitut ngandung gas hidrogén sulfide anu kalintang gedé mangpaatna pikeun sing saha waé anu daék nyeseupna. Cindekna, upama urang atawa batur hitut, ulah mengkék irung, tapi seuseup éta hitut téh, sabab aya gas hidrogén sulfide téa. Beuki bau hitutna beuki hadé mangpaatna. Geura ieu mangpaatna téh:

Ngatur tekanan darah

Hiji panalungtikan netelakeun yen hidrogen sulfide nu kaluar dina waktuna hitut bisa ngatur tekanan darah pikeun anu nyeseupna. Jadi, sacara eksplisit, bauna hitut teh hade pikeun ngatur tekanan darah jalma anu ngangseuna.

Ku hadéna tekanan darah, urang moal nyorang anu ngaranna kasakit tekanan darah tinggi atawa tekanan darah rendah. Apan tekanan darah tinggi jeung tekanan darah rendah téh bisa nimbulkeun rupa-rupa kasakit kayaning anemia, stroke, serangan jantung, lieur, atawa nyeri sirah.

Anti inflamasi

Ku ayana gas hidrogén sufide, hitut bisa jadi anti inflamasi pikeun jalma anu nyeuseupna. Ari inflamasi téh radang, kayaning radang dina lambung, tikoro, usus, jeung dina organ-organ sejenna.

Anti bengkak

Hidrogén sufide ogé bisa jadi anti bengkak, bisa nyegah ayana babareuhan dina awak jalma anu nyeuseupna.

Ngalancarkeun jalanna getih dina awak

Gas hydrogén sulfide oge bisa ngalancarkeun jalanna getih dina awak urang, sabab ku sipatna eta gas bisa ngalonggarkeun jeung ngalenturkeun jaringan pembuluh darah darah véna jeung artéri. Ku lancarna getih dina awak urang, rupa-rupa panyakit ogé bisa dicegah, asupan getih jeung oksigén kana organ-organ awak urang ogé kabawa lancar, fungsina organ jadi optimal, daya tahan awak jadi kuat, sarta penyumbatan pembuluh darah bakal kakenyed. 

Ngurangan resiko katarajang panyakit parna

Ku nyeseup gas hidrogén sulfide anu aya dina hitut, urang moal gampang katerap ku panyakit parna kayaning kanker, diabetes, dementia, stroke, serangan jantung, jeung tumor.

Ngadétéksi gastrointestinal

Gas hidrogén sulfide ogé bisa ngadétéksi gastrointestinal. Ari gastrointestinal téh mangrupa pasualan dina organ pencernaan kayaning radang usus, radang lambung, gangguan kandung kemih, batu ginjal, sarta panyakit pencernaan lianna. 

Pikeun ngadétéksi gangguan gastrointestinal carana gampang. Lamun urang hitutna kurang ti 14 kali dina sapoe, eta hartina bisa jadi pencernaan dina awak urang ngalaman gangguan.

Ubar asup angin

Ku ayana hitut, angin anu asup kana awak urang bakal incah. Cirina asup angin téh apan beuteung kembung, ngurel, puyeng, malah bisa nepi ka demamna awak urang téh. Lian ti hitut, asup angin oge bisa cageur ku kaluarna angin ngaliwatan teurab.

Ciri alusna organ pencernaan pasca operasi

Pikeun pasén nu geus nyorang operasi di rumah sakit, dokter ngawawadian sangkan si pasén tong waka barangdahar atawa nginum saencanna hitut. Upama dilanggar bisa jadi mamala. Hitut nu kaluar pasca operasi nandakeun yén pencernaan si pasén geus normal deui. [] Endang GG

Tina rupa-rupa sumber