Nu Kumaha Ékonomi Kréatif téh?

Mémbér-mémbér PT Konter Kita Satria kuciwa ku sikep pamaréntah nu geus nutup kagiatan usahana. Ku kajadian kitu, arinyana jadi teu ngarti, naon saenyana nu dimaksud ékonomi kréatif ku pamaréntah téh? | dokumentasi

Puluhan rébu member PT Konter Kita Satria nganaha-naha kana sikep pamaréntah nu geus ngeureunkeun kagiatan éta pausahaan, 18 Juli 2017. Padahal, salila ngajalankeun kagiatan usahana, PT Konter Kita Satria anu ngadeg bulan Séptémber 2016 di Purwokerto, Jawa Tengah, henteu kungsi nguciwakeun mémbér-mémbérna. Buktina, Ibu Tonika, urang Cimahi, Jawa Barat, meunang untung Rp 1 milyar ti PT Konter Kita Satria. Pon nyakitu mémbér-mémbér séjénna. 

“Nu puguh mah, ku dieureunkeunana kagiatan usaha PT Konter Kita Satria, mémbér-mémbérna jadi liwung,” cék Gyan anu asup jadi mémbér PT Konter Kita Satria bulan April 2017. “Boro tadina mah, hasil usaha ti PT Konter Kita Satria ku abdi tos diancokeun kanggé ngalunasan sametan,” pokna deui ka sundaonline.com, dina acara gempungan mémbér di Auditorium STIKES Rajawali Bandung, Jumaah, 28 Juli 2017.

Mémbér lianna, Ir. Irfan Luthfi nétélakeun yén kagiatan usaha nu diajalankeun ku PT Konter Kita Satria téh transaksi jual beuli, lain kagiatan invéstasi bodong sakumaha anu disebutkeun ku Otoritas jasa Keuangan (OJK). PT Konter Kita Satria umajak ka mémbér-mémbérna sangkan mindahkeun balanjana ka PT Konter Kita Satria. Tiap mémbér anu balanja (transaksi) kayaning meuli pulsa, meuli token, meuli kuota, mayar listrik, mayar BPJS, jeung sajabana, di PT Konter Kita Kita, bakal meunang cash back dina bentuk voucher point (VP). Ari VP téh kauntungan pausahaan anu dibagikeun ka mémbérna. VP nu katampa ku mémbérna bakal ngarekahan ku ayana sistim split. Saban ayana split, éta VP téh bakal nambahan 40%. Upama jumlah VP-na geus manjing, si mémbér bisa ngajual VP-na ka bursa nu diayakeun ku PT Konter Kita Satria.

Ku mémbér-mémbérna, ngajual VP téh sok disebut panén. Sabab, ku cara ngajual éta VP, si mémbér bakal narima kauntungan. Saban mémbér boga kasempetan lima kali pikeun panén. Hasil panénna rupa-rupa, gumantung kana setatus kaanggotaanana. 

Basajan tur asup akal sistim usahana mah. Ngan, anéh, ku pamaréntah, lebah dieu mah ku OJK, disebut invéstasi bodong. Tah, sesebutan éta nu matak kéder pikeun mémbér-mémbér PT Konter Kita Satria téh. Ongkoh pamaréntah téh keur ngagederkeun gerakan  ékonomi kréatif, tapi kréativitas nu geus diwangun ku anak bangsa kawas PT Konter Kita Satria kalah ka ditindes sina paéh. Padahal sidik, ku paéhna PT Konter Kita Satria, pamaréntah geus maéhan harepan puluhan rébu rahayat Indonésia.

Cindekna, jebulna korban téh sabada ayana campur leungeun pamaréntah, da saméméhna mah genah, betah, tumaninah nu jaradi mémbér téh.

“Janten teu kahartos ku abdi mah, nu dimaksad gerakan ékonomi kréatif ku pamaréntah téh nu kumaha atuh?” Gyan gogodeg bari tuluy ngusap dada. [] Endang GG